"بىرلىك بار جەردە تىرلىك بار" دەگەن اتالى ءسوز ءدال بۇگىنگى كۇنگە ارناپ ايتىلعانداي. بىرلىكتىڭ، تاتۋلىقتىڭ ارقاسىندا عانا قازاق بۇل ىندەتتى جەڭىپ شىعاتىنى انىق. ءبىر اتانىڭ بالاسىنداي بىرىگىپ، ەلدىڭ اماندىعىن ويلاعان قايىرىمدى ازاماتتاردىڭ قامقورلىعىنىڭ ناتيجەسىندە تالدىقورعان قالاسىنىڭ اۋرۋحانالارىنا وكپەنى جەلدەتەتىن 10 اپپارات سىيعا تارتىلدى.

ەلدىڭ ەرتەڭى ءۇشىن الاڭداعان اتىمتاي جومارت ازاماتتار حالىق يگىلىگى ءۇشىن 5 ميلليوننان اسا قاراجات جيناعان. جەكە كاسىپكەر داۋرەن ءتالىپوۆتىڭ ايتۋىنشا، بۇل شارا وسىمەن توقتاپ قالمايدى. حالىق ءقازىردىڭ وزىندە ءبىر اۋىزدان جينالىپ، 70 اپپاراتتىڭ قۇنىن شىعارىپ قويعان. شامامەن 10 كۇننىڭ ىشىندە اپپاراتتار تاراتىلماق. بۇل قايىرىمدىلىق شاراسىنا بارشا قازاقستاندىق شاماسى كەلگەنشە اتسالىسقان. ءيا، مەيرىمدى جاننىڭ بارلىعى ءبىر مەزەتتە جۇمىلىپ كۇرەسسە بۇل ىندەتتەن ارىلاتىنىمىز انىق.

الماتى وبلىستىق اۋرۋحانانىڭ ديرەكتورى مۇرات راحمەتوۆ ەل باسىنا اۋىر كۇن تۋعاندا جۇدىرىقتاي جۇمىلىپ ۇلكەن ءىس تىندىرىپ جۇرگەن ازاماتتارعا ريزاشىلىعىن ءبىلدىردى.

– ءدال ءقازىر اق حالاتتى ابزال جاندار ادام جانىن اراشالاۋ ءۇشىن ىندەتپەن كۇرەسىپ ءجۇر. بۇل مايدان وتە ءقاۋىپتى. ءبىراق، سىزدەردىڭ قولداۋلارىڭىز بەن مەيىرىمدىلىكتەرىڭىز ەرتەڭگى كۇنگە دەگەن ءۇمىتىمىزدى ەسەلەپ جاتقانىن ەرەكشە اتاپ وتكىم كەلەدى. كۇن سايىن قايىرىمدى جاندار اۋرۋحاناعا اس-اۋقات، سۋسىن، قىمىز الىپ كەلەدى. الەمدى مەيىرىمدىلىك قۇتقاراتىنىنا وسى جولى تاعى دا كوز جەتكىزدىك. كۇنى كەشە عانا اۋرۋحانا توسەگىنە وتە اۋىر حالدە تۇسكەن ناۋقاس دەرتتەن ايىعىپ، ۇيىنە ورالدى. ەكى اي ەمدەلىپ، ءوز اياعىمەن جاقىندارىنا ورالعان ازامات ءۇشىن ءبىز قاتتى قۋاندىق. جانىنا اراشا سۇراپ، بىزدەن قولداۋ كۇتىپ كەلگەن ءار ناۋقاس جاقىندارىمەن جاقسىلىقتا تابىسسا ەكەن دەپ تىلەيمىز. اق حالاتتىلاردىڭ ارمانى – ادامزاتتىڭ ساۋلىعى. بىرلىكتىڭ، تاتۋلىقتىڭ ارقاسىندا بۇل مايداندى دا جەڭەتىنىمىز انىق. وزدەرىڭىزدى، جاقىندارىڭىزدى قورعاڭىزدار دەگىم كەلەدى. ءسىزدىڭ جاۋاپكەرشىلىگىڭىز – ەلدىڭ اماندىعى ەكەنىن ەستەن شىعارماڭىز، – دەدى اۋرۋحانا ديرەكتورى.

تالدىقورعان قالاسىندا پاندەميا كەزىندەگى ءىس-قيمىلداردى ۇيلەستىرۋ جونىندەگى شتاب قۇرىلدى. ونىڭ قۇرامىندا قوعام قايراتكەرلەرى مەن اۋرۋحانالاردىڭ باس دارىگەرلەرى بار.

ايدار قالييەۆ

الماتى وبلىسى