قازاق قوعامىندا قايىرىمدىلىق جاساۋ ءۇردىسى ەجەلدەن بولعان. سول دانا بابالارىمىزدىڭ سارا جولىن جالعاپ كەلە جاتقان ەرىكتىلەردىڭ بۇگىنگى ىلكىمدى ءىسى كوپكە ۇلگى. كۇللى الەمدى دۇرلىكتىرگەن ىندەت ەلىمىزدە ءورشىپ تۇرعان ۋاقىتتا ءوز ەركىمەن اقىسىز قىزمەت كورسەتىپ، قايىرىمدىلىق جاساپ جۇرگەن جەتىسۋلىق ەرىكتىلەر ناعىز ەلىم دەگەن پاتريوتتار.

الماتى وبلىسى اۋماعىندا «مەيىرىمدى جەتىسۋ» ەرىكتىلەر فرونت-كەڭسەسىنىڭ جۇمىسى جۇزەگە اسىرىلىپ كەلەدى. جىل باسىندا جالپى سانى 1 مىڭ 43 بولعان وبلىس ەرىكتىلەرىنىڭ سانى كۇن ساناپ وسۋدە. قازىرگى تاڭدا وبلىسىمىزدا 2 مىڭ 77 ەرىكتى جاستار تىركەلىپ، كوپتىڭ العىسىنا بولەنىپ كەلەدى.

رەسپۋبليكالىق «ءبىز بىرگەمىز» اكسياسى اياسىندا 2 مىڭ 300 قايىرىمدىلىق اكسيالارى مەن ءىس-شارالار وتكىزىلدى. الەۋمەتتىك جاعدايى تومەن، از قامتىلعان جانە كوپبالالى وتباسىلار مەن جالعىزباستى انالارعا، جالپى 17 مىڭ وتباسىنا الەۋمەتتىك كومەك كورسەتىلىپ، ازىق-تۇلىكپەن قامتاماسىز ەتىلدى. وبلىس ەرىكتىلەرىنىڭ اتسالىسۋىمەن بۇگىنگى كۇندە 64 مىڭ مەديسينالىق بەتپەردە تىگىلىپ، 12 مىڭ  ليتر انتيسەپتيك تۇرعىندارعا جەتكىزىلدى.

كوروناۆيرۋس ينفەكسياسىنىڭ انىقتالۋىنا بايلانىستى كارانتينگە جابىلعان 20 مىڭنان استام تۇرعىنى بار «اسىل ارمان» تۇرعىن ءۇي كەشەنى وبلىس جاستارى مەن ەرىكتىلەرىنىڭ نازارىنان تىس قالعان جوق. «مەيىرىمدى جەتىسۋ» ەرىكتىلەرى تۇرعىن ءۇيدىڭ كارانتين جاعدايىندا بولعانىنا قاراماستان تۇرعىندارعا مەديسينالىق بەتپەردە، گيگيەنالىق زاتتار جانە ازىق تۇلىك جەتكىزىپ تۇردى.

تۇركىستان وبلىسى ماقتاارال اۋدانىنا الماتى وبلىسىنان 15 جۇك كولىگىمەن 260 توننا گۋمانيتارلىق كومەك جەتكىزىلگەن ساتتە وبلىس ەرىكتىلەرى كوش باسىندا ءجۇردى. جەتىسۋ جۇرتشىلىعىنىڭ اقجولتاي اماناتىمەن وڭىردەن 20-عا جۋىق ەرىكتى جاستار بارىپ، ءبىر اپتا بويى قالپىنا كەلتىرۋ جۇمىستارىنا اتسالىستى. سونداي-اق، سۋ تاسقىنىنان زارداپ شەككەن وتباسىن ازىق-تۇلىك جانە وزگە دە قاجەتتى زاتتارمەن قامتاماسىز ەتىپ وتىردى.

ەرىكتى جاستار گۋمانيتارلىق كومەك جينالعان قويمالارعا كۇنىنە 300-350 توننا ازىق-تۇلىك، 250 توننا قۇرىلىس زاتتارىن ءتۇسىرىپ قانا قويماي مەكتەپ-ينتەرناتتارعا ورنالاستىرىلعان تۇرعىنداردىڭ، بالالاردىڭ كوڭىلىن اۋلاۋ ماقساتىندا مۋلتفيلم جانە كينو كورسەتىلىم ۇيىمداستىردى. بالالارعا بازارلىق تا تاراتىلدى.

14 مامىر كۇنى قاتتى جاۋىن اسەرىنەن تۇركىستان وبلىسىنىڭ بىرنەشە اۋىلدارىن سۋ باسقانى بارىمىزگە بەلگىلى. وسى كەزدە جەتىسۋدىڭ ەرىكتىلەرى وقيعا ورنىنا ءبىرىنشى بولىپ كومەككە باردى. تولە بي اۋدانى، لەڭگىر قالاسى جانە كيەلىتاس اۋىلىنىڭ تۇرعىندارىن ەۆاكۋاسيالاۋ جۇمىسىنا قاتىسىپ، وتانداستارىمىزعا كومەك كومەك قولىن سوزدى.

قازىرگى تاڭدا وبلىس ەرىكتىلەرى كۇش بىرىكتىرىپ، مەديسينالىق قۇرال-جابدىقتارمەن قامتاماسىز ەتۋگە اتسالىسۋدا. سونىمەن قاتار، دارىگەرلەرگە قىمىز تاراتۋ، اۆتوەرىكتىلەر تۇرعىندارعا دارى-دارمەك جەتكىزۋ ءىسى دە قولعا الىنعان. بۇگىنگى كۇنى وڭىردە 70-كە جۋىق اۆتوەرىكتى بار. ولار كۇن دەمەي ءتۇن دەمەي ناۋقاستارعا قاجەتتى دارى-دارمەكتى، اس-اۋقاتتى جەتكىزىپ بەرۋدە.

جاسىراتىنى جوق، ەلدە كارانتين جاريالانعان ساتتە-اق ازىق-تۇلىك تاپشىلىعى بولادى دەگەن حالىقتىڭ بازار مەن دۇكەننەن جاپپاي تاماق ساتىپ الۋ ءۇشىن كەزەككە تۇرعانىن كورگەنبىز. ۇكىمەت پەن جەرگىلىكتى اتقارۋشى بيلىك تاراپىنان ايتىلعان ءتۇسىندىرۋ جۇمىستارىنا قۇلاق اسپاعان حالىقتىڭ الاڭداعان كوڭىلىن ءوز پايداسىنا جاراتىپ، تاۋارىن قىمباتتاتقان ساتۋشىلار قاتارى دا كوپ كەزدەستى. وسىنداي سىن ساتتە جەتىسۋلىقتاردىڭ اتقارعان ەرەن ەڭبەگىن ەرەكشە اتاپ وتكەنىمىز ءجون. ەرىكتىلەر رەيدكە كوپ شىعىپ، تۇرعىندارعا تىعىز شارۋاسى بولماسا ۇيلەرىندە وتىرۋعا كەڭەس بەرىپ، بەتپەردە تاعىپ ءجۇرۋدىڭ ماڭىزىن ءتۇسىندىرۋدى ءوز مىندەتىنە العان.

«ءبىز بىرگەمىز» رەسپۋبليكالىق اكسياسى بويىنشا اتقارىلعان ءىس ءبىرشاما. وبلىس بويىنشا ۇلكەن ءىس تىندىرعان بىرنەشە اۋداننىڭ ەرىكتىلەرىن تىلگە تيەك ەتكەندى ءجون سانادىق. اقسۋ اۋدانىنىڭ ەرىكتى جاستارى الەۋمەتتىك تۇرمىس جاعدايى تومەن 370  وتباسىنا ازىق-تۇلىك رەتىندە كومەك كورسەتتى. اتالعان وتباسىلارعا اۋدان دەمەۋشىلەرى 1 ميلليون 250 مىڭ تەڭگەگە كومەك كورسەتتى. «جاقسىلىق جاساپ جارىسايىق» اكسياسى اياسىندا اۋىل جاستارى اقسۋ اۋدانىنىڭ ورتالىق اۋرۋحاناسىندا Covid-19 جۇقپاسىمەن اۋىرىپ جاتقان ناۋقاستار مەن اق حالاتتى دارىگەرلەرگە 200 ليتر شۇبات، قىمىز جەتكىزدى. قوي ەتىن، 50 قاپ ۇن جانە قاجەتتى ازىق-تۇلىكپەن قامتاماسىز ەتتى. اقسۋ اۋدانىنىڭ ەرىكتى جاستارى جانە الەۋمەتتىك بلوگەر دانيار بەيىسقالي مەن مەرۋەرت دۇپبايەۆانىڭ باستاماسىمەن ارنايى قاراجات جيناپ، اۋداندىق ورتالىق اۋرۋحاناعا 5 پونسەنتراتتىق اپپاراتقا تاپسىرىس بەردى. بۇگىندە 2 اپپارات اۋرۋحانا باسشىلارىنا تابىستالدى. قالعان 3 اپپارات الداعى ۋاقىتتا جەتكىزەلەتىن بولادى. اۋدان تۇرعىندارى ءۇشىن 700 مىڭ تەڭگەگە قاجەتتى دارى-دارمەك جەتكىزىلدى. «شۋاق» ەرىكتىلەرى جانسۇگىر اۋىلىنىڭ تۇرعىندارىنا اۋدان كاسىپكەرلەرى مەن اجەلەر قاۋىمداستىعىنىڭ كومەگىمەن تىگىلگەن 2 مىڭ 500  مەديسينالىق بەتپەردەنى تەگىن تاراتتى. اقسۋلىق ەرىكتىلەر اۋدان بويىنشا ءۇي كارانتيندە وقشاۋلانعان 18 وتباسىنا كۇندەلىكتى قاجەتتى ازىق-تۇلىك زاتتارىن  جەتكىزىپ تۇرۋدى قولعا العان.

ەڭبەكشىقازاق اۋدانىنىڭ ەرىكتىلەرى وسى كۇنگە دەيىن 13 ميلليون 300 مىڭ تەڭگە كولەمىندە 900 وتباسىن ازىق-تۇلىك جانە مەديسينالىق بەتپەردەمەن قامتاماسىز ەتتى. اۋداننىڭ جومارت ازاماتتارى جاس ءبۇلدىرشىننىڭ وتاسىنا قاجەتتى 500 مىڭ تەڭگەنى قايىرىمدىلىق ەسەبىندە تارتۋ ەتىپ، اعدايى تومەن وتباسىنىڭ  جالدامالى پاتەرىنىڭ 2 ايلىق تولەمىنە كومەكتەستى. وسىنداي قيىن كەزەڭدە ءومىر ءۇشىن كۇرەسىپ جاتقان ەمدەلۋشى ازاماتتارمىزعا كەرەكتى وتتەگى كونسەنتراتورىنا قاجەتتى قاراجاتتى جيناپ، اۋداندىق اۋرۋحاناعا 6 وتتەگى كونسەنتراتورىن تابىستادى. «بۇگىنگى كۇننىڭ باتىرلارى» اتتى اكسيا اياسىندا اق حالاتتى ابزال جاندارعا 150 ليتر قىمىز ۇسىنىلدى. بۇل يگى باستاما الداعى ۋاقىتتا دا ءوز جالعاسىن تابا بەرمەك.

اقىندار مەن باتىرلار ەلى  جامبىل اۋدانىندا 100 جاس ەرىكتى ءوز ەركىمەن جۇمىس ىستەيدى. بۇدان وزگە اۋداندا 30-دان استام ەرىكتىلىك توپتار قارقىندى جۇمىس اتقارۋدا. ايتا كەتەر بولساق، «ارداگەرلەردى ارداقتايىق»، «قايىرىمدىلىق ءقادىرلى ءىس» «تازا اۋدان – تازا اۋىل» اكسيالار ۇنەمى اتقارىلىپ تۇرادى. توتەنشە جاعداي كەزىندە اۋدانداعى الەۋمەتتىك جاعدايى تومەن از قامتىلعان  5 مىڭ 500  وتباسىعا اۋدانداعى جانە شەت قالالارداعى جەكە كاسىپكەرلەر جانە  اۋقىمدى مەكەمەلەر تاراپىنان ازىق-تۇلىك جەتكىزىلدى. اۋدان تۇرعىندارىنا 3 مىڭ دانا مەديسينالىق بەتپەردە تەگىن ۇلەستىرىلدى. قايىرىمدىلىق شاراسىنا قولداۋ كورسەتكەن «حالىق» قايىرىمدىلىق قورى، «تاۋەكەل گاز» ج ش س، «پلاست-ينۆەست» ج ش س، «ماجيتوۆا» ج ش س، «Kusto Group» كومپانياسى، «جامبىل» رەس، «تابىس» شق، «جاقسىلىق» شق، اۋداندىق جۇمىسپەن قامتۋ ورتالىعى، «جەتىسۋ» جك، اۋداندىق توتەنشە جاعدايلار بولىمىنە ەرىكتىلەردىڭ ايتار العىسى مول.

ۇيعىر اۋدانىنىڭ جاستارى وتكىزگەن اكسيادا 240 وتباسىنا كومەك كورسەتتى. شونجى اۋىلىنىڭ ەرىكتىلەرى ماقتاارال وڭىرىندەگى تۇرعىندارعا كومەك رەتىندە 2 ميلليون سومماعا 2 جۇك كولىگىمەن 150 دانا ماتراتس، 3 توننا ۇن، 100 كگ ماكورون ونىمدەرىن، 50 بلوك سۋ، گيگيەنالىق تاۋارلار جولدادى.

ەرىكتىلەردە ەرلىكتىڭ ۇلگىسى بار. ويتكەنى ولار ەلى ءۇشىن قولدا بارىن اياماي، قالتىقسىز قىزەت ەتەدى. ال توتەنشە جاعدايدى سەبەپ قىلماي، ەلگە تەگىن قىزمەت كورسەتىپ جۇرگەن جەتىسۋلىق ۆولونتەرلەردىڭ يگى ءىسى ەرلىكپەن پارا-پار.

ايدار قالييەۆ

الماتى وبلىسى