ايسۇلۋ بايتەنوۆا اتتى قوستاناي تۇرعىنى الەۋمەتتىك جەلىدە بۇرىنعى كۇيەۋىنىڭ بىرنەشە جىلدان بەرى ءجابىر كورەتىپ، قورقىتىپ كەلە جاتقانىن ايتىپ كومەك سۇرادى.

ايسۇلۋ بايتەنوۆا قوستاناي وبلىسى قارابالىق كەنتىندە باستاۋىش سىنىپ ءمۇعالىمى بولىپ جۇمىس ىستەگەن. 2016 جىلى اجىراسىپ كەتكەن سوڭ، كۇيەۋى وعان قوقان-لوققى كورسەتىپ، ءمۇعالىمنىڭ جۇمىستان شىعۋىنا تۋرا كەلگەن. كەيىن جۇمىسىن كورشى اۋدانعا اۋىستىرعان. قازىرگى ۋاقىتتا ول جاڭا جۇمىس ورنىنا بۇرىنعى كۇيەۋى ىزدەپ كەلەدى مە دەپ قورقادى.

– مەن بۇرىنعى كۇيەۋىممەن 2016 جىلى اجىراستىم. ول مەنى ۇراتىن. سوڭعى رەت مەنى ۇرعان كەزىندە پوليسياعا ارىزداندىم. ارىز جازعاننان كەيىن بۇرىنعى كۇيەۋىمنىڭ تاتەسى حابارلاسىپ، ءوزىنىڭ ۇيىنە مەنى شاقىردى. ول مەنەن ارىزىمدى قايتارىپ الۋدى تالاپ ەتتى. ەگەر دە قايتارىپ الماسام "جۇمىستان شىعارىپ جىبەرەمىن"، "ديپلوممەن اۋىلعا باعدارلاماسى ارقىلى العان پاتەرىڭدى تارتىپ الامىن" دەپ قورقىتتى. ول كىسى – م.ا. ساپاروۆا گازەت رەداكتورى بولىپ جۇمىس جاساعاندىقتان، ول جەردە ونىمەن ەشكىم بايلانىسپايدى. سودان امال جوق مەن ءوز ارىزىمدى قايتارىپ الدىم.

ەندى مەنىڭ باسقا باراتىن جەرىم جوق. ول (بۇرىنعى كۇيەۋىم – رەد.) بەتىمە "كيسلوتا" شاشىپ كەتەمىن دەپ قورقىتادى.  ماعان تىنىش ءومىر سۇرۋگە مۇمكىندىك بەرمەي وتىر. جۇمىستان كەلە جاتقاندا ۇيگە كىرۋگە، ءبىر جەرگە بارۋعا قورقامىن. بولىپ جاتقان وقيعالاردان بالامنىڭ پسيحيكاسى بۇزىلدى. ەندى قارابالىق كەنتىنەن باسقا مەكتەپكە جۇمىسقا ورنالاسقىم كەلەدى، ءبىراق ول وسى جاققا دا ىزدەپ كەلەدى دەپ قورقامىن، – دەدى ايسۇلۋ بايتەنوۆا.

الەۋمەتتىك جەلىدە تاراعان ۆيدەوعا ىشكى ىستەر مينيسترلىگى جاۋاپ بەردى.

"ءىس قارابالىق اۋدانىنىڭ پوليسيا بولىمىنە تىركەلدى. ۆيدەودا ايتقان دەرەكتەرلەرگە تەكسەرۋ جۇمىستارى جۇرگىزىلەدى، ناتيجەسى حابارلانادى. سونىمەن قاتار بۇرىنعى ەرلى-زايىپتىلار اراسىنداعى قاقتىعىس اۋداننىڭ ءتيىستى ورگاندارىنىڭ نازارىندا" دەلىنگەن مينيسترلىك تاراتقان حابارلامادا.

ىشكى ىستەر مينيسترلىگى قوستاناي وبلىسى پوليسيا دەپارتامەنتى باسشىلىعىنىڭ ءىستى باقىلاۋعا العانىن حابارلادى.