بۇگىن بۇكىل الەم مۇسىلماندارى اتاپ وتەتىن قۇربان ايت مەرەكەسىندە ءماجىلىس دەپۋتاتتارى ەلىمىزدىڭ ءار ايماعىندا كوروناۆيرۋس ىندەتىنىڭ سالدارىنىڭ قيىن جاعدايعا تاپ بولعان قازاقستاندىقتارعا قايىرىمدىلىق شارالارىن وتكىزدى.

قاسيەتتى مەرەكەدە دەپۋتاتتار مۇمكىندىگى شەكتەۋلى جاندارعا، كوپ بالالى وتباسىلار مەن قارتتارعا ازىق-تۇلىكتەر مەن قاجەتتى زاتتار مەن جەكە قورعانىس قۇرالدارىن جەتكىزدى.

نۇر-سۇلتان قالاسىندا ءماجىلىس دەپۋتاتتارى بەرىك وسپانوۆ، اسىلبەك سماعۇلوۆ جانە نۇرجان التايەۆ مۇقتاج جاندارعا كومەك كورسەتتى.

ولار قازاقستان مۇسىلماندارى ءدىني باسقارماسىنىڭ وكىلدەرىمەن بىرگە قارتتار مەن كوپبالالى وتباسىلارعا بارىپ، ازىق-تۇلىكتەر مەن قۇرباندىققا شالىنعان مالدىڭ ەتتەرىن بەردى.

ءماجىلىس دەپۋتاتتارى بۇل كۇندەرى تەك ءىرى قالالارعا عانا ەمەس، وبلىس ورتالىقتارى مەن شالعايداعى ەلدى مەكەندەرگە دە باردى. «اق جول» پارتياسىنىڭ پارلامەنتتىك فراكسياسىنىڭ جەتەكشىسى ازات پەرۋاشيەۆ ەلوردادان 160 شاقىرىم جەردە ورنالاسقان اقمولا وبلىسىنىڭ ەرەيمەنتاۋ اۋدانىندا بولدى. ماجىلىسمەن 30 وتباسىنا ازىق-تۇلىك پەن قاجەتتى تاۋارلار جەتكىزدى. سونىمەن قاتار، ا.پەرۋاشيەۆ اۋداندىق اۋرۋحانانىڭ دارىگەرلەرى مەن مەديسينالىق قىزمەتكەرلەرىمەن كەزدەسىپ، اۋرۋحاناعا دارى-دارمەكتەر مەن جەكە قورعانىس قۇرالدارىن سىيعا تارتتى.

سونىمەن قاتار، قايىرىمدىلىق اكسيالارىنا ءماجىلىس دەپۋتاتتارى «حالىقتىق كوممۋنيستەر» فراكسياسىنىڭ اتىنان ايقىن قوڭىروۆ پەن جامبىل احمەتبەكوۆ تە بەلسەندى قاتىستى. ماجىلىسمەندەر «شاپاعات» جوباسى اياسىندا كوپ بالالى وتباسىلارعا، زەينەتكەرلەرگە، سونداي-اق بالالار ءۇيىنىڭ بۇرىنعى تۇلەكتەرىنە ازىق-تۇلىكتەي كومەك كورسەتتى.

ءماجىلىس دەپۋتاتى ابزال ەرالييەۆ قىزىلوردا وبلىسىنداعى كوپتەگەن وتباسىلارعا الەۋمەتتىك قولداۋ كورسەتتى.

كورسەتىلگەن كومەككە ريزاشىلىق بىلدىرگەن ءوڭىر تۇرعىندارى قازاقستاندىق قوعامنىڭ باستى قۇندىلىقتارى – بەيبىتشىلىكتى، كەلىسىم مەن بىرلىكتى جانە بىر-بىرىنە قۇرمەت پەن قولداۋ كورسەتۋدىڭ ماڭىزدىلىعىن اتاپ ءوتتى.

ايتا كەتۋ كەرەك، قۇربان ايت مەرەكەسى اياسىندا قايىرىمدىلىق اكسيالارى ءماجىلىس دەپۋتاتتارىنىڭ ەسەبىنەن ۇيىمداستىرىلدى.

ءىس-شارالار بارلىق سانيتارلىق نورمالار مەن كارانتين ەرەجەلەرىن قاتاڭ ساقتاي وتىرىپ وتكىزىلدى.

ءماجىلىستىڭ باسپا ءسوز قىزمەتى