تارازدىق پوليسيا مايورى ديليافرۋز كينجەحانوۆا توعىز ۇل-قىزدى تاربيەلەپ وتىرعان كوپبالالى انا. ونىڭ بەسەۋى ءوزىنىڭ بالاسى بولسا، تورتەۋىن اسىراپ العان، دەپ حابارلادى ىشكى ىستەر مينيسترلىگىنىڭ باسپا ءسوز قىزمەتى.

ءوزى دە ۇلكەن اۋلەتتەن شىققان پوليسيا مايورى ديليافرۋز كينجەحانوۆا وسكەندە كوپبالالى انا بولۋدى ارمانداعان. بۇگىندە ول ءوز ارمانىنا قول جەتكىزدى دەۋگە بولادى. قازىرگى تاڭدا تاراز قالالىق پوليسيا باسقارماسىنىڭ كامەلەتكە تولماعاندار ءىسى جونىندەگى پوليسيا اعا ينسپەكتورى بولىپ قىزمەت ەتەتىن ديليافرۋز ءوزىنىڭ توعىز بالانىڭ اناسى اتانىپ وتىرعاندىعىن ماقتان تۇتادى.

ءارى ۇلكەن جاۋاپكەرشىلىك ەكەنىن جان-جۇرەگىمەن سەزىنەدى. ول ءوزىنىڭ بەس پەرزەنتىمەن قاتار 4 بالانى باۋىرىنا باسقان. مۇنداي وي وعان №55 ورتا مەكتەپتە وتكەن "مەكتەپكە جول" اكسياسى بارىسىندا كەلىپتى. ءتورت بالانىڭ تاعدىرى سوندا شەشىلگەن.

ول كەزدە بالالاردىڭ ۇلكەندەرى مارات 17 جاستا، راحىم 15 جاستا بولسا، قارىنداستارى راميلا مەن ديانا 10 جانە 6 جاستا ەدى.

– مەن زاڭدى وكىلدەرسىز وتباسىن انىقتايتىن كوميسسيا قۇرامىندا بولدىم. بۇل بالالاردىڭ اناسى ومىردەن وزعان. اكەسى جوق ەكەن. اتاسى تاربيەلەپ وسىرگەن. قۇجاتتارىن قالپىنا قالپىنا كەلتىرۋگە ءبىرشاما ۋاقىت كەرەك بولدى. وسى ۋاقىت ارالىعىندا مەن ولاردى ۇيىمە اپاردىم جانە مۇمكىندىگىنشە كومەكتەسۋگە ءسوز بەردىم. بالالار ماعان باۋىر باسىپ قالىپ، تاستاپ كەتپەۋىمدى ءوتىندى. ولاردىڭ بۇل تىلەكتەرىن ورىنداماۋعا جۇرەگىم شىدامادى. وسىلايشا مەن قامقورشىلىقتى راسىمدەپ، ولارعا انا بولۋعا بەل بۋدىم، – دەپ ديليافرۋز جان-سىرىمەن ءبولىستى.

العاشقى كۇندەردەن-اق بالالار بىر-بىرىمەن ورتاق ءتىل تابىسىپ كەتىپتى.

– مەن بارلىق بالالارىمدى بىردەي جاقسى كورەمىن. ولار ءۇشىن الاڭداپ، قورعاۋعا تىرىسامىن. بالالار دا مەنىڭ جۇمىسىمنىڭ قيىن ءارى جاۋاپكەرشىلىگى مول ەكەنىن ءتۇسىنىپ، ماعان قولعابىس جاسايدى. ءۇي شاراۋاسىندا ۇنەمى كومەك كورسەتىپ، جاناشىرلىق تانىتادى. بۇل ءبىزدىڭ بىر-بىرىمىزگە دەگەن ماحابباتىمىز بەن سۇيىسپەنشىلىگىمىزدىڭ كورىنىسى، – دەيدى پوليسيا قىزمەتكەرى.

بۇگىندە ديليافرۋزدىڭ ەكى ۇلكەن ۇلى اناسىنىڭ جولىن قۋىپ، پوليسيا قىزمەتكەرى بولۋعا بەكىنگەن. ولار انالارىنىڭ جۇمىسىنا قىزىعىپ، قيىندىقتارعا قاراماستان، ادامدارعا بارىنشا كومەك كورسەتۋگە دايىن.

– مەن ءوز جۇمىسىمدى جاقسى كورەمىن. وسى جولدا تۇسىنىستىك تانىتىپ، شىنايى قامقورلىق پەن جان-جاقتى كومەك كورسەتىپ كەلە جاتقان باسشىلىعىما العىس ايتامىن، – دەيدى كوپبالالى انا.