بۇگىن پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا قازاقستانداعى 2020-2021 وقۋ جىلىنىڭ باستالۋىنا دايىندىق ماسەلەسى قارالدى.
2020-2021 وقۋ جىلىندا قازاقستاننىڭ 7 391 مەكتەبىندە 3،3 ملن-نان استام ادام، ونىڭ ىشىندە 1-سىنىپتا 396 مىڭنان استام بالا ءبىلىم الادى. قازىرگى جاعدايدا وقۋ جىلىنىڭ ءبىرىنشى توقسانى قاشىقتان وتەدى. وقىتۋدىڭ ءداستۇرلى فورماتى بارلىق سانيتارلىق نورمالاردى قاتاڭ ساقتاي وتىرىپ، تەك شاعىن فورماتتاعى مەكتەپتەردە، سونداي-اق باستاۋىش مەكتەپتىڭ "كەزەكشى" سىنىپتارىندا ساقتالادى.
ۇكىمەت باسشىسى وقىتۋ ادىستەمەسىن تولىق پىسىقتاپ، بيىلعى 20 تامىزعا دەيىن الداعى وقۋ ءۇردىسى تۋرالى تولىق اقپارات بەرە وتىرىپ، ونلاين رەجيمدە رەسپۋبليكالىق اتا-انالار جينالىسىن ۇيىمداستىرۋدى تاپسىردى.
– ۇكىمەت اسا مۇقتاج وتباسىلاردىڭ بالالارىنا پايدالانۋ ءۇشىن شامامەن 500 مىڭ كومپيۋتەر بەرۋدى قامتاماسىز ەتەدى. سونداي-اق اكىمدىكتەر جەرگىلىكتى دەڭگەيدە كومپيۋتەر تەحنيكاسىمەن قامتاماسىز ەتۋ ماسەلەسىن پىسىقتاسىن، – دەدى ا. مامين.
پرەمەر-مينيستر ءبىلىم جانە عىلىم مينيسترلىگىنە اكىمدىكتەرمەن بىرلەسىپ، وسى جىلدىڭ 25 تامىزىنا دەيىن وقۋشىلار مەن پەداگوگتەردىڭ وقۋ جىلىنىڭ قاشىقتان باستالۋىنا تولىق دايىن بولۋىن، مۇعالىمدەردىڭ ءتيىستى وقۋدان وتكىزىلۋىن، ينتەرنەت-پلاتفورمالاردا جانە تەلەديداردا قاجەتتى كونتەنتتىڭ تولىق كولەمدە دايىندالۋىن قامتاماسىز ەتۋدى تاپسىردى.
وقۋلىقتار 25 تامىزعا دەيىن بەرىلەدى. وقۋلىقتاردىڭ قاعاز جۇزىندەگى نۇسقالارىنىڭ بارىندە مىندەتتى تۇردە ەلەكتروندىق نۇسقالارى بولۋعا ءتيىس، ولار قولجەتىمدى بولۋى قاجەت.
پىكىر قالدىرۋ