الماتى وبلىسىندا 11225 وتباسىنا ەت تاراتىلدى. بۇل تۋرالى جۋرناليستەر ۇيىندە وتكەن بريفينگتە ءمالىم بولدى.

پاندەمياعا بايلانىستى بيىل الماتى وبلىسىنىڭ تۇرعىندارى قۇربان ايت مەرەكەسىن جاڭا ەرەجەلەر بويىنشا اتاپ ءوتتى. قازاقستان مۇسىلماندارى ءدىني باسقارماسى تالدىقورعان ءوڭىرى بويىنشا باس يمامى ارداق ورازبايەۆتىڭ باستاماسى بويىنشا قاسيەتتى مۇسىلمان مەيرامىنا دايىندىق ادەتتەگىدەن ەرتەرەك باستالدى.

– بيىل كارانتيندىك شارالارعا سايكەس جانە قاتاڭ سانيتارلىق نورمالاردى ساقتاي وتىرىپ، تالدىقورعاندا ارنايى بولىنگەن جەردە 1 تۇيە، 56 ءىرى قارا، 611 ۇساق ءمۇيىزدى ءىرى قارا قۇرباندىققا شالىندى. ال اۆتوەرىكتىلەر (مۇمكىندىگى شەكتەۋلى جانداردى تەگىن تاسىمالدايتىن كولىك جۇرگىزۋشىلەرى) 5531 مۇقتاج جانە كوپبالالى وتباسىنا، تۋا بىتكەن اۋرۋلارى بار ادامدارعا، قارت ادامدار مەن اۋرۋحانالارعا ەت جەتكىزدى، – دەدى ارداق ورازبايەۆ.

جالپى 31 شىلدە مەن 2 تامىز ارالىعىندا الماتى وبلىسى بويىنشا 1 تۇيە، 145 باس ءىرى قارا جانە 3409 باس ۇساق مال سويىلدى. ال 400-گە جۋىق ەرىكتى 11 225 مۇقتاج وتباسىنا ەت جەتكىزدى. مىسالى، ونلاين ءوتىنىم ارقىلى الاكول اۋدانى بويىنشا بارلىعى 17 ءىرى قارا جانە 530 ۇساق مال قۇرباندىققا شالىندى. ال ەت 1064 مۇقتاج وتباسىنا تاراتىلدى. كەربۇلاق اۋدانىندا "مايتوبە ەت" ج ش س مال سويۋ پۋنكتىندە 47 باس ءىرى قارا مەن 12 باس قوي سويىلدى. بۇل اۋداندا دا ەرىكتىلەر 636 كوپبالالى جانە از قامتىلعان وتباسىلارعا ەت جەتكىزدى. سونداي-اق، قۇربان ايت مەرەكەسى كەزىندە ەسكەلدى اۋدانى بويىنشا 15 باس ءىرى قارا، 321 ۇساق مال سويىلىپ، ونىڭ ەتى 865 كوپبالالى جانە از قامتىلعان وتباسىنا تاراتىلدى.

ەسكە سالايىق، ونلاين رەجيمىندە قۇرباندىق شالۋ وبلىستىڭ بارلىق اۋداندارى مەن قالالارىندا 25 ارنايى بەلگىلەنگەن اۋماقتا ءوتتى.