ءبىز سابىرمەن كارانتين شارالارىن ساقتاپ، بىر-بىرىمىزگە قۇرمەتپەن قاراۋىمىز كەرەك. الماتى يمامدارى قاۋىپسىزدىك ەرەجەلەرىن ۇستانۋعا شاقىرادى.

الماتى قالاسىنىڭ بوستاندىق اۋدانىنىڭ «بايكەن» مەشىتىنىڭ باس يمامى دانيار جۇمابايەۆ الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين-بريفينگ بارىسىندا اۋدان تۇرعىندارىن باس مەملەكەتتىك سانيتار دارىگەر بەلگىلەگەن تالاپتاردى ساقتاۋعا شاقىردى.

«بۇگىندە كارانتين شارالارىن ساقتاۋ ماقساتىندا ءبىرقاتار مەكەمەلەر، سونىڭ ىشىندە مەشىتتەر دە ءوز قىزمەتتەرىن توقتاتتى. بۇل شارالار قاۋىپسىزدىك ءۇشىن، تۇرعىنداردىڭ دەنساۋلىعى جانە وسى كەزەڭنەن ويداعىداي ءوتىپ، ءوزىمىزدىڭ قالىپتى ءومىر سالتىمىزعا ورالۋ ءۇشىن قولعا الىنعان»، — دەدى دانيار جۇمابايەۆ.

الماتى قالاسىنىڭ باس مەملەكەتتىك سانيتار دارىگەرىنىڭ قاۋلىسىنا سايكەس، الماتىدا 2020 جىلدىڭ 31 شىلدەسى مەن 2 تامىز ارالىعىندا قۇربان ايتتى مەرەكەلەۋ كەزىندە كوروناۆيرۋس ينفەكسياسىنىڭ تارالۋىنىڭ الدىن الۋدا تىيىم سالىنعان:

1)جەكەمەنشىك فورماسىنا قاراماستان، ۇيىمداردا، سونىمەن بىرگە، جەكە يەلىكتەگى ءۇي-جايلار مەن مەدرەسەلەردە ادامداردىڭ جاپپاي جينالۋىمەن شارالاردى وتكىزۋگە؛

2)الماتى قالاسىنىڭ اۋماعىندا مال سويىسىن ۇيىمداستىرۋعا جانە سويۋعا؛ اۆتوكولىكتەردە مال ساتۋعا جانە جەكە يەلىكتەگى ءۇي-جايلاردا مال ساتۋعا.

31 شىلدە مەن 2 تامىز ارالىعىندا مالداردى ساتۋدى جۇزەگە اسىراتىن سويۋ سەحتارى مەن بازارلاردىڭ جۇمىسى توقتاتىلادى، قۇرباندىق شالۋ ونلاين رەجيمدە الماتى قالاسىنىڭ ورتالىق مەشىتى بەكىتكەن ورىنداردا جۇرگىزىلەدى.

ەپيدەميولوگيالىق قىزمەت مالىمەتتەرىنە سايكەس، قالا تۇرعىندارىنىڭ اراسىندا كوروناۆيرۋس ينفەكسياسىنىڭ تارالۋىن بولدىرماۋ ءۇشىن ماسكا رەجيمىنە، الەۋمەتتىك قاشىقتىقتى ساقتاپ، تەرىگە ارنالعان انتيسەپتيكتەردى قولدانۋ كەرەكتىگىن ەسكە سالامىز. سونىمەن بىرگە، ادامدار كوپ باراتىن ورىندارعا بارماۋ كەڭەسى ۇسىنىلادى. سونداي-اق، قالادا اۋقىمدى تۇردە دەزينفەكسيا جۇرگىزىلۋدە.