بۇگىنگى كۇنى الماتى قالاسىنىڭ اكىمدىگى مەگاپوليستىڭ مەديسينالىق ۇيىمدارىن جەكە قورعانۋ زاتتارىمەن قامتاماسىز ەتۋ ءۇشىن جان-جاقتى شارالاردى جۇزەگە اسىرۋدا.

مىسالى، EURASIAN MACHINERY كومپانياسى الماتىدا كوروناۆيرۋس ينفەكسياسىنىڭ تارالۋىنا قارسى كۇرەس اياسىندا قالانىڭ مەديسينالىق ۇيىمدارىنا 2،5 مىڭ جەكە قورعانۋ زاتتارىن بەرۋدە.

بۇل جەكە قورعانۋ زاتتارى الماتى قالاسىنداعى مەديسينالىق ۇيىمدارعا بولىنەتىن بولادى. كەشەندى زاتتار ىشىندە وبا اۋرۋىنا قارسى ءبىر رەتتىك كوستيۋمدەر، ماسكالار، قولعاپتار، كوزاينەكتەر بار.

«ءبىزدىڭ كومپانيادا مۇقتاج جاندارعا كومەك كورسەتۋ جونىندە ارنايى باعدارلاما جاسالعان. سوندىقتان ءبىزدىڭ COVID-19-عا قارسى كۇرەستە بەلسەندىلىك تانىتقىمىز كەلەدى. بۇل گۋمانيتارلىق كومەك شاعىن، ءبىراق كوروناۆيرۋسقا قارسى كۇرەسكە قوسقان ۇلەسىمىز بولىپ تابىلادى»، — دەدى EURASIAN MACHINERY كومپانياسىنىڭ ديرەكتورى مەحمەت يرەندە.

ەسكە سالساق، كەشە Dolce-Pharm وتاندىق فارمكومپانياسى بيزنەستىڭ الەۋمەتتىك جاۋاپكەرشىلىگى اياسىندا 100 مىڭ ماسكا بەردى، ولار شاھارداعى 23 مەديسينالىق مەكەمە اراسىندا ءبولىنىپ، تاراتىلادى.