الماتىدا قۇربان ايت كۇندەرى قۇرباندىققا شالىنعان ەتتى مۇقتاج جاندارعا جەتكىزىپ بەرۋ ۇيىمداستىرىلادى. بۇل تۋرالى الماتى قالاسى بوستاندىق اۋدانى «بايكەن» مەشىتىنىڭ باس يمامى دانيار جۇمابايەۆ ايتتى.

يمامدار حالىقتى جاپپاي مەشىتكە بارماۋعا شاقىردى.

«بيىلعى جىلى قۇربان ايت ءداستۇرلى مەرەكەسىنىڭ اياسىندا كارانتيندىك شەكتەۋ شارالارىنا بايلانىستى مەشىتتەر جانىندا قۇرباندىق شالىنبايدى جانە ونىڭ ەتى تاراتىلمايدى. قۇرباندىققا شالىنعان ەتتى الۋعا ءوتىنىش بىلدىرگەندەرگە مەشىتكە كەلۋدىڭ قاجەتى جوق. قۇرباندىق ەتى ارنايى قۇرىلعان شتاب ارقىلى مۇقتاج جانداردىڭ ۇيلەرىنە جەتكىزىلەدى»، - دەدى دانيار جۇمابايەۆ.

يمام كارانتين تالاپتارىن ساقتاۋ ءۇشىن الماتى قالاسىنىڭ مەشىتتەرىندە مەرەكەلىك ايت نامازى وقىلمايتىنىن ايتتى.

قۇرباندىق شالۋعا ءوتىنىش بەرۋ جانە مۇقتاج، از قامتىلعان قالا تۇرعىندارىنىڭ ەت الۋعا قالدىرعان وتىنىشتەرىن الۋ Qurban2020.kz سايتى ارقىلى 24 شىلدەدەن 30 شىلدە ارالىعىندا جۇرگىزىلەدى.

وسى ۋاقىتقا دەيىن 1305 ادام ەت الۋعا ءوتىنىش بىلدىرگەن. 2 جانە 3 تامىز كۇندەرى قۇرباندىققا شالىنعان ەت تاراتىلادى.

قوسىمشا اقپاراتتى 8(700)7197622، 8(727)3976390 بايلانىس تەلەفوندارى ارقىلى بىلۋگە بولادى.