الماتى وبلىسىنداعى جانارماي قۇيۋ بەكەتىندەگى جارىلىستان جاپا شەككەن ەكى ازاماتتىڭ ءبىرى كوز جۇمدى. بۇل تۋرالى astanatv.kz حابارلادى.

دارىگەرلەردىڭ ايتۋىنشا، دەنەسىن 90 پايىز كۇيىك شالعان 72 جاستاعى كولىك جۇرگىزۋشىسى اۋرۋحانادا جان تاپسىرعان. 

– دەنەسىنىڭ 90 پايىزى كۇيگەن. اۋىر جاراقاتپەن رەانيماسياعا جاتقىزىلدى. وكىنىشكە قاراي ساعات كەشكى 8-گە تامان قايتىس بولدى. مارقۇمنان ەشقانداي دا ىشىمدىكتىڭ بەلگىلەرى بولعان جوق، – دەدى "ەڭبەكشىقازاق اۋدانارالىق كوپسالالى اۋرۋحاناسى" شجق كمك باس دارىگەرىنىڭ ورىنباسارى ديدار ايتجانوۆ.

6 تامىز كۇنى ساعات 10 شاماسىندا ەسىك قالاسىندا ورنالاسقان جانارماي قۇيۋ بەكەتىندە "Land Cruiser Prado" ماركالى اۆتوكولىك گاز سيستەرناسىنا سوعىلۋىنان جارىلىس بولعان.

الايدا مارقۇمنىڭ تۋىستارى "بۇل جەردە تاعى ءبىر كىنالىنىڭ بولۋى مۇمكىن" دەيدى. ەندى ولار الەۋمەتتىك جەلى ارقىلى جارىلىستى كوزىمەن كورگەن كۋاگەرلەردى ىزدەستىرۋدە. ءقازىر تەرگەۋ امالدارى ءجۇرىپ جاتىر.