توبىل قالاسى جۇقپالى اۋرۋلار ستاسيونارىنىڭ دارىگەرى رەتىندە قايتا بىلىكتىلىكتەن وتكەن №4 قوستاناي ەمحاناسىنىڭ دارىگەرى عابيت اتامبۋزوۆ شىلدە ايىندا دارىگەرلەردىڭ پنيەۆمونيامەن قالاي جانكەشتى كۇرەسكەنى تۋرالى ايتىپ بەردى.

"فورس-ماجور جاعدايىن ەسكەرىپ، ءبىز بىردەن ارىپتەستەرىمىزگە كومەككە اتتاندىق"

قاراعاندى مەديسينالىق ۋنيۆەرسيتەتىن ويداعىداي ءتامامداپ، وتكەن كۇزدە تۋعان جەرىم – قوستانايعا ورالدىم. جالپى پراكتيكا دارىگەرى رەتىندە قابىلداۋ جۇرگىزە باستادىم. الايدا مامىر ايىندا ەمحاناداعى جۇمىسىمنان ۋاقىتشا باس تارتۋعا تۋرا كەلدى. ادامدار اۋىرىپ، قالادا كارانتين باستالدى، ەمحانا جانىنداعى پروۆيزور بولىمىنە ماماندار قاجەت بولدى. باسشىلىق ۇسىنىس جاساپ، مەن ىنتاممەن وسى جۇمىسقا كەلىستىم. بۇل – دارىگەرگە قاجەتتى تاجىريبە. ارينە، جاقىندارىم ءۇشىن الاڭداپ، قورىقتىم، سول سەبەپتى دە بىردەن ولاردان وقشاۋلاندىم. وتباسىما راحمەت، مەنىڭ شەشىمىممەن كەلىسىپ، قولداۋ جاسادى. بىر-بىرىمىزگە بەينەقوڭىراۋ شالىپ، سويلەسىپ تۇرامىز، وعان دا ەتىمىز ۇيرەنىپ قالدى.

كەيىننەن ءموبيلدى بريگادا قۇرامىندا شاقىرۋلارعا شىعىپ ءجۇردىم. شىلدە ايىنىڭ باسىندا جاعداي اسا اۋىر بولدى، ءبىر كۇندە شالىناتىن قوڭىراۋلار سانى مىڭنان اسىپ جىعىلاتىن. جۇمىس تاڭەرتەڭنەن كەشكە دەيىن دامىلدامايتىن. سونداي كۇندەردىڭ بىرىندە، جۇمىستىڭ سوڭىنا قاراي تەلەفوننان توبىل قالاسىنىڭ جۇقپالى اۋرۋلار اۋرۋحاناسىندا پنيەۆمونياعا شالدىققان ناۋقاستار كوبەيگەنى، جاعداي ۋشىعىپ، دارىگەرلەردىڭ ۇلگەرمەي جاتقانى حابارلاندى. ۋاقىت كەشكى جەتى-سەگىزدەر شاماسى، ەمحانادا مەن جانە ارىپتەسىم ەكەۋمىز عانا قالعان بولاتىنبىز. حاباردى الا سالا فورس-ماجور جاعدايىن ەسكەرىپ، ءبىز بىردەن ارىپتەستەرىمىزگە كومەككە اتتاندىق.

"ءبىز ءقازىر سوعىستا جۇرگەندەيمىز"

العاشقى كۇندەر اسا قيىن بولدى. ءبولىم جاقىندا عانا اشىلعان، ال وبلىستا ناۋقاستار سانى كۇن ساناپ كۇرت ءوسىپ جاتتى. كۇن ىستىق، "جەدەل جاردەم" ماشينالارى بىرنەشە ساعات قاتارىنان كەزەكتە تۇرادى. ىشىندە – پنيەۆمونياعا شالدىققان، جاعدايلارى وتە اۋىر ناۋقاستار.

ولاردىڭ بارلىعىنا جەدەل كومەك قاجەت. سوندىقتان بىزگە دەمالىسسىز، تاڭعى سەگىزدەن كەشكى سەگىزگە دەيىن تولاسسىز جۇمىس ىستەۋگە تۋرا كەلدى. كۇشىمىز دە ازايا باستاعان سياقتى. كۇنىنە 70-كە دەيىن ناۋقاستى تەكسەرىستەن وتكىزىپ جۇردىك. لاس ايماقتان قورعانىس كيىمىمەن مالمانداي سۋ بولىپ شىعاتىنبىز.

ءوز-وزىمدى مىعىم ۇستاۋعا نە سەبەپ بولعانىن بىلمەيمىن، مۇمكىن، جاستىق پەن ىنتا، كومەك كورسەتۋگە دەگەن قۇلشىنىس شىعار. ءبىر تاۋلىك بويى اياعىمنان تىك تۇرىپ، كەزەكشىلىگىمدى اتقارىپ، ارتىنان بىرنەشە ساعات قانا دەمالىپ، قايتادان تاۋلىكتىك كەزەكشىلىككە شىعاتىنمىن. وسىنداي كەزدە تەك مورالدىق تۇرعىدان قاتتى شارشايتىنمىن. اعا بۋىن ارىپتەستەرىمە اۋىر قورعانىس كوستيۋمدەرىن كيىپ ءجۇرۋ وڭايعا سوققان جوق. ءبىز ءقازىر سوعىستا جۇرگەندەيمىز. تەك كورىنبەيتىن جاۋ – ۆيرۋسپەن كۇرەسۋدەمىز. سوڭعى ناۋقاس دەرتىنەن ايىعىپ شىقپايىنشا، مەن دە وسى ستاسيوناردا بولامىن. وسىلاي بۇل جاعدايدان دا حالىقپەن بىرگە وتەرمىز. ماڭگى بۇلاي بولا بەرمەيدى عوي. دارىگەر رەتىندە بۇل جاعداي مەن ءۇشىن ۇلكەن تاجىريبە بولدى. ۇيرەنگەنىم كوپ.

"پاسيەنتتەردىڭ ناۋقاسىنان ايىعىپ، اۋرۋحانادان شىعۋى دارىگەر ءۇشىن ءبىر عانيبەت قوي"

مەن پاسيەنتتەردىڭ، ءبىزدى، مەديسينا قىزمەتكەرلەرىن، تۇسىنگەنىن قالار ەدىم. ءبىز ولاردان ازبىز، سوندىقتان ولاردىڭ بارلىعىنا بىردەن نازار اۋدارۋ قيىن. كوپتەگەن اۋىر ناۋقاستار بولدى – جاسى ۇلعايعان، سوزىلمالى اۋرۋى بارلار، وكپەنىڭ زاقىمدانۋى 90-95 پايىز بولعان ناۋقاستار. ءبارىن قۇتقارۋ مۇمكىن ەمەس ەدى. ءبىز ءارقايسىسى ءۇشىن قولدان كەلگەننىڭ ءبارىن جاسادىق جانە ءالى دە جاساپ جاتىرمىز. ءبىراق ۆيرۋس ەشكىمدى دە اياپ جاتقان جوق...

مەديسينالىق ۋنيۆەرسيتەتتىڭ ءبىرىنشى كۋرسىندا وقىپ جۇرگەن شاعىمدا پرورەكتور، كەرەمەت دارىگەر جانە وقىتۋشى ۆيلەن بوريسوۆيچ مولوتوۆ-لۋچانسكييدىڭ "دارىگەر – بۇل سالقىنقاندىلىق، مەيىرىمگە تولى جۇرەك، جىلى قولدار" دەگەن سوزدەرى مەنىڭ جۇرەگىمدە ماڭگە ساقتالىپ قالىپتى. اسا ءبىر اۋىر كەزەڭدەردە (پاسيەنتتەر ءارتۇرلى بولادى عوي)، مەن ۇنەمى ىشىمنەن وسى سوزدەردى قايتالايمىن. كەز كەلگەن جاعدايدا ادام بولىپ قالۋ ماڭىزدى دەپ سانايمىن. بىرەۋگە جىلى قاباق، مەيىرىمدى سوزدەر، ال بىرەۋگە قاتالدىق قاجەت.

ارينە، پاسيەنتتەردىڭ ناۋقاسىنان ايىعىپ، اۋرۋحانادان شىعۋى دارىگەر ءۇشىن ءبىر عانيبەت قوي. ولاردىڭ باقىتتان بال-بۇل جانعان جۇزدەرىن، كۇلىپ، العىس بىلدىرگەنىن كورۋدىڭ ءوزى ءبىر كەرەمەت سەزىم. ولاردىڭ سوزدەرى، شىنايى ايتقان تىلەكتەرى بويمىزعا كۇش-قۋات بەرىپ، ءوزىمىزدىڭ قاجەتتىلىگىمىزدى سەزىندىرەدى. پاسيەنتتەر ءبىزدى ەستەرىنە ساقتاپ قالا المايدى، ادەتتە تانىمايدى دا، ويتكەنى ولارعا ءبىز قورعانىس كيىمىن كيىپ، باستان اياق تۇمشالانىپ كەلەمىز. تەك اۋرۋحانادان شىعارار ۋاقىتتا، ولارعا ۇسىنىستار جازىلعان اۋرۋحانا پاراعىن بەرۋ ءۇشىن كادىمگى ماسكامەن بارعان كەزدە، ولاردىڭ "دارىگەر، ءسىز وسىنداي ەكەنسىز عوي!" دەپ تاڭقالا ايتقان سوزدەرىن ەستيمىن.