16 تامىزدا سەناتتىڭ ەكس-توراعاسى داريعا نازاربايەۆانىڭ ەكىنشى ۇلى ايسۇلتان راحاتتىڭ لوندوندا قايتىس بولعانى حابارلاندى.
اقپارات شىققاننان كەيىن بىرنەشە ساعات وتكەندە داريعا نازاربايەۆا قارالى حاباردى راستاپ، بالاسىنىڭ قازاسى تۋرالى پىكىر ءبىلدىردى.
ولىمگە ناقتى نەنىڭ سەبەپ بولعانى، ايسۇلتان راحاتتىڭ لونداندا نە ىستەپ جۇرگەنى ازىرگە بەلگىسىز. تەك جۇرەك تالماسى ۇستاعان بولۋى مۇمكىن ەكەنى عانا حابارلاندى.
قازاقستان ەكس-پرەزيدەنتى جيەنىنىڭ قاتىسۋىمەن سوڭعى جىلدارى بىرنەشە شۋلى وقيعا بولعان.
2019 جىلى 18 قازاندا لوندون سوتى ونى پوليسيا قىزمەتكەرىنە قارسىلىق كورسەتتى، وفيسەرگە جابۋىل جاسادى دەگەن ايىپپەن ءبىر جىلعا شارتتى مەرزىمگە كەسكەن. سول كەزدە ايسۇلتان راحاتتىڭ ەسىرتكى پايدالانعانى حابارلاندى.
2020 جىلدىڭ 23-24 قاڭتار كۇندەرى ول ءوزىنىڭ facebook-تەگى پاراقشاسىندا كوپتەگەن داۋلى جازبالار جاريالادى.
"2016 جىلدان بەرى وتباسىم مەن وتباسىما جاقىن ادامداردان قىسىم كورىپ كەلەم" دەگەن ول 14 اي بويى رەسەي تۇرمەدە زاڭسىز وتىرعانىن، نۇرسۇلتان نازاربايەۆتىڭ بيولوگيالىق اكەسى ەكەنىن ايتىپ، قازاقستان بيلىگىندەگى كوپتەگەن شەندىلەردى "حالىقتىڭ جاۋى" دەپ اتاعان.
22 قاڭتاردا جاريالاعان جازباسىندا ءوزىن الدەكىمدەردىڭ ولتىرۋگە تىرىسۋى مۇمكىن ەكەنىن ءمالىم ەتتى.
"جاقىن ۋاقىتتا مەنى ولتىرۋگە تىرىسۋى، بولماسا جىندى ەتىپ كورسەتكىسى كەلۋى نەمەسە اكەمدى اسقانداي كامەرادا اسىپ كەتۋى مۇمكىن" دەپ جازعان بولاتىن ايسۇلتان راحات 22 قاڭتاردا.
پىكىر قالدىرۋ