قازاقستاننىڭ ەكس-پرەزيدەنتى نۇرسۇلتان نازاربايەۆتىڭ جيەنى ايسۇلتان راحاتتىڭ جەرلەۋ ءراسىمى وتەتىن كۇن بەلگىلى بولدى. بۇل تۋرالى Kaztag اگەنتتىگى حابارلادى.

اگەنتتىك ءوزىنىڭ دەرەككوزدەرىنە سۇيەنە وتىرىپ، ايسۇلتان راحاتتىڭ جەرلەۋ ءراسىمى 17 تامىز كۇنى وتەتىنىن جازدى.

ايسۇلتان راحات – قازاقستان سەناتىنىڭ ەكس-سپيكەرى داريعا نازاربايەۆانىڭ ەكىنشى ۇلى. 

♦ "مەنى ولتىرۋگە تىرىسۋى مۇمكىن". ايسۇلتان ءومىرى ءۇشىن قاۋىپتەنگەن

كەشە 16 تامىزعا قاراعان ءتۇنى ونىڭ لوندون قالاسىندا قايتىس بولعانى حابارلانعان.

ول سوڭعى ۋاقىتتا Facebook-تە بەلسەندى بولىپ، ءوزى جانە وتباسى تۋرالى، قازاقستان بيلىگىندەگىلەر، قۇداي جايلى ءجيى جازعان. 17 شىلدەدە جاريالانعان سوڭعى جازباسىن "KAZ Minerals"، "قازاقمىس حولدينگتىڭ" ديرەكتورى ۆلاديمير كيمگە ارناعان.

ا.راحاتتىڭ قايتىس بولعانى جايلى اقپاراتتان بىرنەشە ساعات وتكەن سوڭ، نۇرسۇلتان نازاربايەۆ قورىنىڭ Facebook پاراقشاسىندا داريعا نازاربايەۆا ۇلىنىڭ دۇنيەدەن وزۋىنا قاتىستى پىكىرىن ءبىلدىردى.