بۇگىن قازاقستاندا ۇلى ويشىل اباي قۇنانبايەۆتىڭ كۇنى اتاپ وتىلۋدە. اعىمداعى جىل باسىنان بەرى ابايدىڭ تۋعان جەرى شىعىس قازاقستانداعى ماڭىزدى مادەني-تاريحي نىساندارعا جوندەۋ جۇمىستارى جۇرگىزىلدى. الايدا كوروناۆيرۋس پاندەمياسىنا بايلانىستى بۇل كۇنگە وراي جوسپارلانعان شارالار قاشىقتىقتان ۇيىمداستىرىلۋدا.

 سەمەيدەگى الاڭ جانە اباي اتىنداعى تەاتر مەن مۇراجايدا جۇرگىزىلىپ جاتقان جوندەۋ جۇمىستارى اياقتالۋعا جاقىن.

الاڭ جاڭاشا كەلبەتكە يە بولدى. جازۋشىنىڭ ەسكەرتكىشى جوندەلدى. تەاتردا تولىق قايتا قالپىنا كەلتىرۋ جۇمىستارى جۇرگىزىلگەنىنە قاراماستان اتالمىش نىساننىڭ تاريحي ەرەكشەلىكتەرى ساقتالدى. سونداي-اق تەاتر اۋماعىندا اباتتاندىرۋ جۇمىستارى جاسالىپ، عيماراتتىڭ ىشكى جانە سىرتقى جاعىنا جوندەۋ جۇرگىزىلۋدە. ونەر ورداسى جايلى ءارى جارىق بولىپ قالدى. سەمەيلىكتەر مەن قالا قوناقتارىن جاڭا ساحنا مەن كورەرمەن زالى كۇتۋدە. اباي مۇراجايى دا جاقىندا كەلۋشىلەرگە ەسىگىن ايقارا اشادى. ونىڭ اۋماعىندا ابايدىڭ ۇلدارىمەن بىرگە بەينەلەنگەن ەسكەرتكىشى بوي كوتەرەدى.

«اباي-شاكارىم» مەموريالدىق كەشەنىنىندە جۇرگىزىلىپ جاتقان قايتا قالپىنا كەلتىرۋ جۇمىستارى دا اياقتالۋعا جاقىن قالدى. سەمەيدەگى اباي اتىنداعى كىتاپحاناعا دا جوندەۋ جاسالدى.

اقشوقىداعى قۇنانباي اۋلەتى مۇراجايىنىڭ قۇرىلىسى اياقتالادى. مۇندا كورمە زالىنان بولەك، مەكتەپ وقۋشىلارىنا ساباق وتكىزۋگە مۇمكىندىك جاسالادى. اباي دۇنيەگە كەلگەن سىرت-قاسقابۇلاقتىڭ ماڭى اباتتاندىرىلادى.

بۇگىن، شىعىس قازاقستاندا ۇلى اقىننىڭ 175 جىلدىق مەرەيتويىنا وراي بارلىق قالا مەن اۋدانداعى ابايدىڭ ەسكەرتكىشتەرىنە گۇل شوقتارىن قويۋ ءراسىمى ءوتتى. سەمەيدەگى شىعارماشىلىق زيالى قاۋىم وكىلدەرى شقو اكىمى دانيال احمەتوۆپەن بىرگە اباي قۇنانبايەۆتىڭ ەسكەرتكىشىنە گۇل شوقتارىن قويدى.

سونداي-اق ونلاين رەجيمدە XXI رەسپۋبليكالىق اباي وقۋلارىنىڭ وبلىستىق كەزەڭى ۇيىمداستىرىلدى. بايقاۋ بارىسىندا جالپى ورتا ءبىلىم بەرەتىن جانە وبلىستىق مامانداندىرىلعان مەكتەپتەردە ۇلى اقىننىڭ مۇراسى قايتا جاڭعىردى. بالالار ونەرلەرىن ورتاعا سالىپ، اباي ولەڭدەرى مەن شاكارىم قۇدايبەردى ۇلىنىڭ، اقىلباي ماعاۋيا ۇلىنىڭ، ماعاۋيا اباي ۇلىنىڭ ناقىل سوزدەرىن مانەرلەپ، جاتقا وقىدى. بۇدان بولەك ابايدىڭ ورىنداۋىنداعى اندەرى مەن كۇيلەرىن ورىنداپ، اتاقتى جازۋشىنىڭ شىعارماشىلىعىنان سىر شەرتەتىن ەسسە جازدى.

«ۇزدىك مانەرلەپ وقۋشى» اتالىمىنا سەمەيلىك بەس جاسار ءبۇلدىرشىن بوتا تالعات تا ۇمىتكەر بولا الادى. بۇگىن اباي قۇنابايەۆتىڭ 175 جىلدىعىنا وراي ءبۇلدىرشىن اقىننىڭ 20-دان استام ولەڭىن وقىپ، اندەرىن ورىنداپ بەردى.

س.امانجولوۆ اتىنلاعى شقمۋ-دا ۆەنگريا مەن تۇركيا ەلدەرىندەگى جوو-ى وقىتۋشىلارىنىڭ قاتىسۋىمەن ونلاين سەمينار ءوتتى.

جالپى، اعىمداعى جىل باسىنان بەرى شقو-داعى مادەنيەت، ارحيۆتەر جانە قۇجاتتاما باسقارماسى 20 شارا وتكىزۋدى جوسپارلاعان ەدى. ونىڭ ىشىندە بىرنەشەۋى ونلاين فورماتتا ۇيىمداستىرىلدى. وعان ادەبيەتتانۋشىلار، جازۋشىلار مەن اقىندار، سونداي-اق شىعارماشىلىق جاعىنا بەت بۇرعان جاستار قاتىستى. سونىمەن قاتار ابايتانۋشى عالىم عاريفوللا ەسىمنىڭ قاتىسۋىمەن «اعا سۇلتان قۇنانباي: اڭىز بەن اقيقات» اتتى وبلىستىق عىلىمي-تاجىريبەلىك كونفەرەنسيا  قاشىقتىقتان ءوتتى. بۇدان بولەك قازاق ءتىلى مەن ادەبيەتى ءپانىنىڭ مۇعالىمدەرىنە ارنالعان «اباي ساعاتى» ۇيىمداستىرىلدى. ونى ابايتانۋشى، وقىتۋشى ايجان كارتايەۆا جۇرگىزدى.