باتىس افريكادا ورنالاسقان مالي رەسپۋبليكاسىندا اسكەريلەر پاراقورلىققا، جەمقورلىققا سەپ بولعان رەجيمدى وزگەرتۋ ءۇشىن قولعا قارۋ الدى. پرەزيدەنتتىڭ ورنىن بوساتۋىن تالاپ ەتكەن ولار پرەزيدەنتتى، ءبىرقاتار مينيسترلەر مەن جوعارى لاۋازىمدى وفيسەرلەردى تۇتقىنداپ، وزدەرىنىڭ اسكەري بازاسىنا جەتكىزگەن.

2020 جىلدىڭ 18 تامىزىندا حالىق جاپپاي پرەزيدەنتتىڭ وتستاۆكاعا كەتۋىن تالاپ ەتىپ، ءبىرقاتار مينيسترلەردە تۇتقىندالعان. وقيعا جەرگىلىكتى قارۋلى كۇشتەردىڭ ارالاسۋىمەن، پولكوۆنيك ساديو كامارانىڭ باسقارۋىمەن بولعان. بۇلىكشىلەردىڭ قولىنا تۇسكەن بيلىك وكىلدەرىنىڭ قۇرامىندا سىرتقى ىستەر ءمينيسترى، قورعانىس ءمينيسترى، ەكونوميكا جانە قارجى ءمينيسترى (ابدۋلا دافە)، ۇلتتىق اسسامبلەيانىڭ سپيكەرى (مۋسسا تيمبين) بار.

قاتارداعى جۇك كولىگىندەگى ساربازدار كاتي قالاسىنداعى سوۋندياتا اسكەري بازاسىنا شابۋىل جاساپ، اعا وفيسەرلەردى دە قاماۋعا العان. قالا كوشەلەرىندەگى تانكتەر مەن برونەترانسپورتەرلەر، سونداي-اق اسكەري جۇك كولىكتەرى باماكو استاناسىنا بەت العانى بەلگىلى بولدى.

18ء-ى كۇنى كەشكە قاراي بۇلىكشىلەر پرەزيدەنتتىڭ ۇلى كاريم كيت پەن پرەمەر-مينيستر بۋبا ءسيسستى تۇتقىندادى. ولار ءماليدىڭ قازىرگى پرەزيدەنتى يبراحيم بۋباكار كەيتاننىڭ ەلدەن كەتۋىن تالاپ ەتتى. العاشقى مالىمەتتەردە پرەزيدەنت يبراحيم بۋباكار كەيتانىڭ ءقاۋىپسىز جەرگە تاپسىرىلعانى جايلى ايتىلعان ەدى. سوڭعى حابارعا سۇيەنسەك، پرەزيدەنت تە قاماۋعا الىندى. 

ەۋروپا كەڭەسىنىڭ پرەزيدەنتى چارلز ميشەلدىڭ ايتۋىنشا،  بۇنداي اسكەري توڭكەرىس (قانشالىقتى اۋقىمدى بولسا دا) ماليلىكتەرگە داعدارىستان شىعۋعا كومەكتەسپەيدى. 

ەلدەگى جوعارى لاۋازىمدى تۇلعالاردى قاماۋعا العانىمەن، بۇلىكشىلەر ءالى دە ناقتى ساياسي جوسپارى مەن تالاپتارىن جاريا ەتپەگەن.