جوسپارلى قىزمەتتى جانداندىرۋ ءۇشىن كەزەڭدىك جوسپار جاسالدى. «الەۋمەتتىك مەديسينالىق ساقتاندىرۋ قورى» كەاق شقو بويىنشا فيليالىنىڭ مالىمەتىنشە، كەشەدەن بەرى 50-دەن استام مەديسينالىق ۇيىم ناۋقاستاردى قابىلداۋدى باستاپ كەتتى.
17 تامىزدان باستاپ كارديولوگيالىق كومەك كورسەتۋ ستاسيونارى، كارديوحيرۋرگيا، ورتوپەديا، بارلىق پەدياترلىق پروفيل، حيرۋرگيا، گينەكولوگيا، ۋرولوگيا، بارلىق تەراپيەۆتىك پروفيلدەر، وڭالتۋ، جۇكتى ايەلدەردى جوسپارلى تۇردە جاتقىزۋ، ءپاللياتيۆتى كومەك كورسەتۋ قايتا باستالدى.
امبۋلاتورلىق-ەمحنالىق كومەك كورسەتۋ اشىلدى. العاشقى مەديسينالىق-سانيتارلىق كومەك بەرۋ ۇيىمدارى مەن ستوماتولوگيالار جوسپارلى قابىلداۋدى جۇرگىزۋدە. سونداي-اق جوسپارلى كونسۋلتاتيۆتى-دياگنوستيكالىق قىزمەت كورسەتىلەدى.
– پروۆيزورلىق ستاسيوناردىڭ جەمىستى جۇمىسىنان سوڭ ءبىز ناۋقاستاردى جوسپارلى تۇردە ەكىنشى جانە ءۇشىنشى كەزەڭ بويىنشا وڭالتۋدى باستادىق. بۇل جاراقات، ورتوپەديا، نيەۆرولوگيا، كارديولوگيا بولىمدەرى جۇمىس ىستەيدى دەگەندى بىلدىرەدى. ادامدار جولداما بويىنشا جوعارى تەحنولوگيالىق كومەك كورسەتەتىن ەمحانادا نەمەسە ستاسيوناردا وڭالتۋدان وتە الادى. جۇرەككە، بۋىندارعا، ومىرتقاعا، باس ميعا جانە جاراقات ورنىنا وتا جاساتا الادى، - دەدى شىعىس قازاقستان وبلىستىق وڭالتۋ ورتالىعىنىڭ باس دارىگەرى تيمۋر تورتايەۆ.
20 تامىزدان باستاپ ستاسيونارلاردا، بولىمشەلەردە، وڭالتۋ كەزىندە ستاسيونار الماستىرعىش تەحنولوگيالار جۇمىس ىستەيدى. سونداي-اق سكرينينگ پەن پروفيلاكتيكالىق قاراۋ جۇمىستارى قايتا جاندانادى.
دەنساۋلىق ساقتاۋ باسقارماسىنىڭ مالىمەتىنشە، وبلىستا 4731 ينفەكسيالىق جانە پروۆيزورلىق توسەك جينالعان. COVID-19 شالدىققان ناۋقاستارعا ارنالعان توسەك قورىنىڭ 16،5 پايىزى بوس ەمەس. وبلىستاعى ورتاشا رەپرودۋكتيۆتىك سانى 0،74 قۇرايدى.
كارانتيننىڭ جەڭىلدەتىلگەنىنە قاراماستان شىعىس قازاقستانداعى مەديسينا قىزمەتكەرلەرى وبلىس تۇرعىندارىن بارلىق قاۋىپسىزدىك شارالارىن ساقتاپ، بەتپەردە (ماسكا) كيۋ رەجيمىن ۇمىتپاي، بۇقارالىق وتباسىلىق شارالاردى ۇيىمداستىرماي، سالاۋاتتى ءومىر سالتىن ۇستانۋعا شاقىرادى.
پىكىر قالدىرۋ