قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ "يادرولىق سىناقتاردان ازات الەم ءۇشىن چەمپيون" مارتەبەسىنە يە بولدى. بۇل تۋرالى بۇۇ قارسى ءىس-قيمىل كۇنىنە ارنالعان ارنايى سەسسياسىندا جاريالاندى.
"يادرولىق سىناقتارعا جاپپاي تىيىم سالۋ شارتى ۇيىمىنىڭ (ياسجتشۇ) اتقارۋشى حاتشىسى لاسسينا زەربو قازاقستاننىڭ يادرولىق قارۋسىز الەم قۇرۋداعى جاھاندىق كۇش-جىگەرگە جەتەكشىلىك كەزىندەگى ەرەكشە تاريحي ۇلەسىن ەسكەرە وتىرىپ، نۇرسۇلتان نازاربايەۆقا جاڭا مارتەبە بەرۋ تۋرالى باستاما كوتەردى. ەلباسىنىڭ 1991 جىلى 29 تامىزدا الەمنىڭ ەڭ ءىرى يادرولىق پوليگوندارىنىڭ ءبىرى – سەمەي يادرولىق پوليگونىن جابۋ تۋرالى شەشىمى ادامزات تاريحىنداعى بۇرىن-سوڭدى بولماعان يادرولىق سىناقتارعا العاشقى زاڭدى تىيىم رەتىندە عانا ەمەس، سونىمەن بىرگە حالىقارالىق كۇندى بەلگىلەۋ ءۇشىن ماڭىزدى نەگىز بولدى" دەلىنگەن رەسمي سايت تاراتقان حابارلامادا.
باستاماشىلاردىڭ بولجاۋىنشا، "چەمپيوندار" ياسجتش-عا قول قويماعان مەملەكەتتەرمەن ماقساتتى ءاقپاراتتىق-تۇسىندىرۋ جۇمىستارىن جۇرگىزەدى، ولار ياسجتش-پەن ىنتىماقتاستىقتىڭ ارتىقشىلىقتارى تۋرالى تۇسىنىكتەرىن جاقسارتۋ، سونداي-اق قازاقستاننىڭ يادرولىق ينفراقۇرىلىمىن ءوز ەركىمەن بولشەكتەۋ سەكىلدى وزىق تاجىريبەلەرىمەن بولىسەدى.
فينليانديانىڭ ەكس-پرەزيدەنتى تاريا حالونەنگە دە وسىنداي مارتەبە بەرىلدى. "چەمپيوندار" سونداي-اق ياسجتشۇ-نىڭ اتاقتى تۇلعالار توبىنىڭ مۇشەلىگىنە كىرەدى.
بۇۇ باس اسسامبلەياسىنىڭ ارنايى سەسسياسىنىڭ بارىسىندا ەلباسى ن.نازاربايەۆتىڭ ءىس-شارا قاتىسۋشىلارعا ۇندەۋىن قازاقستاننىڭ سىرتقى ىستەر ءمينيسترى مۇحتار تىلەۋبەردى وقىدى.
ەلدەگى پاندەمياعا بايلانىستى بۇۇ-نىڭ جوعارى دەڭگەيدەگى ءداستۇرلى ءىس-شاراسى ونلاين رەجيمدە ءوتتى.
