بۇگىن مەملەكەت باسشىسى قاسىم-جومارت توقايەۆ قازاقستان حالقىنا جولداۋىن جاسادى. وسى ورايدا جولداۋعا قاتىستى ساراپشىلاردىڭ پىكىرىن بىلگەن ەدىك. توقايەۆتىڭ كوتەرگەن ماسەلەلەرگە قاتىستى ساياساتتانۋشى، ەۋرازيالىق ىنتىماقتاستىق ينستيتۋتىنىڭ ءبولىم باسشىسى سامات نۇرتازا ءوز ويىمەن ءبولىستى. بۇل تۋرالى Strategy2050.kz حابارلادى.

ساياساتتانۋشىنىڭ ايتۋىنشا، توقايەۆ بۇگىنگى مالىمدەمەلەرى ارقىلى پروبلەمالاردى شەشۋدەن قاشپايتىنىن كورسەتتى.

«بۇعان دەيىن ەلباسى دا، پرەزيدەنت تە 50 مينۋت قانا سويلەيتىن. بۇگىن پرەزيدەنت 1 ساعات 33 مينۋت سويلەدى. مەنىڭ ويىمشا، بۇل كوپتەگەن پروبلەمامىزدىڭ شەشىلەتىنىن، سونىمەن قاتار مەملەكەت باسشىسىنىڭ ماسەلەدەن قاشپايتىنىن كورسەتتى. كەز كەلگەن پروبلەمانى جىلى جاۋىپ قويمايدى. ماسەلەن، جانۋارلاردىڭ قۇقىعىن قورعاۋدان باستاپ بالالاردىڭ قۇقىعىن قورعاۋعا دەيىن ماسەلەنى ايتتى. ۇكىمەتكە دە ءبىرقاتار تاپسىرمانى بەردى»، - دەدى سامات نۇرتازا.

سونىمەن قاتار ول توقايەۆتىڭ اقشا-نەسيە ساياساتىن رەتتەيتىن اگەنتتىك قۇرىلاتىنىن جونىندە پىكىر ءبىلدىردى. ونىڭ سوزىنشە دە، حالىقتىڭ قارجىلىق ساۋاتتىعىن ارتتىرۋ كەرەك.

«ءبىزدىڭ حالىق نەسيە الاتىن كەزدە كەلىسىم-شارتتا جازىلعان ءماتىندى تولىق وقىمايدى. ونى مويىنداۋ كەرەك. ول ءماتىندى ساناۋلى عانا ازامات وقۋى مۇمكىن، ءبىراق ءبارى ەمەس. ويسىز نەسيە الاتىن ازاماتتاردىڭ قارجىلىق ساۋاتتىلىعىن ارتتىرۋ كەرەك. بالكىم ۋنيۆەرسيتەت قابىرعاسىندا نەسيە جونىندە، نەسيەنىڭ قايتارىمى بولۋ كەرەگىن، ونىڭ پايىزى بولاتىنىن ءتۇسىندىرۋ قاجەت. مىسالى، حالىق توي جاساۋعا، شىلدەحانا جاساۋعا نەسيە الا بەرەدى. ساپالى ۇلت قالىپتاستىرۋ كەرەك دەپ جاتىر عوي. ول دەگەنىمىز ءار ءىسىن ويلانىپ ىستەيتىن ادام. نەسيەنى الاردا ءوزىنىڭ قالتاسىن ەسەپتەۋ ارقىلى الۋ-الماۋدى شەشىپ الۋ كەرەك. سوندا عانا ساپالى ۇل قالىپتاستىرا الامىز»، - دەدى ساياساتتانۋشى.

بۇدان بولەك سامات نۇرتازا اۋىل اكىمدەرىن سايلاۋ تۋرالى ءوز ويىمەن ءبولىستى. ونىڭ پايىمىنشا، بۇل - دەموكراتيانىڭ بەلگىسى.

«اۋىل اكىمىن سايلاۋ پروسەسىنىڭ ءادىل ءوتۋى اۋدان اكىمىنىڭ قۇزىرىندا. اۋىل اكىمىن سايلاۋ – دەموكراتيانىڭ بەلگىسى ەكەنىن اتاپ ءوتۋ كەرەك. ەلباسى دا دەموكراتيانىڭ سوڭعى ايالداما ەكەنىن اتاپ وتكەن بولاتىن. الدىمەن اۋىل اكىمىن، ودان كەيىن اۋدان اكىمىن، سودان سوڭ قالا اكىمىن سايلايمىز. وسىلايشا قادام-قاداممەن ەل بولىپ كەتەمىز دەپ ەسەپتەيمىن. اۋىل اكىمىنىڭ سايلاۋى – ءبىزدىڭ قوعامعا بەرىلگەن مۇمكىندىك. سايلاۋ ءادىل وتكەن جاعدايدا، ءبىزدىڭ حالىق دەموراتياعا دايىن دەپ ويلايمىن. اۋىل اكىمدەرىن سايلاۋ – بۇل مەمەلكەتتىڭ تەستى»، - دەپ تۇيىندەدى ءسوزىن.