اتىراۋ پەريناتالدىق ورتالىعىنداعى نارەستە ولىمىنە قاتىستى سوت پروسەسى ءوتتى. سىبايلاس جەمقورلىققا قارسى قىزمەت دەپارتامەنتىنىڭ اسا ماڭىزدى ىستەر جونىندەگى تەرگەۋشىسى اسقاربەك ەرمۇقاشيەۆتان كۋا رەتىندە جاۋاپ الىندى. بۇل تۋرالى azh.kz حابارلادى.

وقيعا 2019 جىلدىڭ 29 قىركۇيەگىندە بولعان. اتىراۋ پەريناتالدىق ورتالىعىندا دۇنيەگە كەلگەن نارەستە قيمىلداماعان سوڭ، ونى قۇجاتقا "ءولى تۋىلدى" دەپ جازعان. الايدا ءسابيدى مۇزداتقىش كامەراسىنا اكەلگەن كەزدە اياعى قيمىلداعان.

جەمقورلىققا قارسى ىس-ارەكەت دەپارتامەنتىنىڭ حابارلاۋىنشا، دارىگەرلەر قۇجاتتار شاتاسپاس ءۇشىن بالانى ءتىرى كۇيىندە مۇزداتقىشتا قالدىرعان. 

سوتتالىپ جاتقان اكۋشەر قۇلباتىروۆانىڭ ادۆوكاتى تالعات مۇقاتانوۆ ەرمۇقاشيەۆتان ءوزى قورعاپ وتىرعان ازاماتتى كىنالاۋعا قانداي سەبەپ بارىن سۇرادى. 

– بۇل جاسىرىن تەرگەۋ امالدارىنىڭ ناتيجەسىمەن دالەلدەنەدى. ەكى ادامنىڭ ءوزارا تەلەفون ارقىلى سويلەسكەن اڭگىمەسى بار. ءسىز قورعاپ وتىرعان ادام – ورىنداۋشى، – دەپ جاۋاپ بەردى.

ادۆوكات "ءسوز بايلاسقان" دەگەن تۇسىنىكتىڭ قايدان شىققانىن سۇراعانىندا:

– مەن جاڭا ايتتىم، تەلەفون ارقىلى سويلەسكەن اڭگىمەنىڭ ستەنوگرامماسى بار، فيلولوگيالىق ساراپتامانىڭ قورىتىندىسى بار، ونىڭ ىشىندە دارىگەرلەر بىر-بىرىمەن كەڭەسىپ، وسى بالانىڭ تاعدىرىن شەشكەنى انىق.  اڭگىمەنىڭ ستەنوگرامماسىندا "قۇداي ءبىزدى كەشىرسىن" دەگەن سوزدەر بار. ولار اڭگىمەنىڭ توركىنى نە تۋرالى ەكەنىن ءتۇسىندى، – دەدى ەرمۇقاشيەۆ.

"جوعارعى سوتتىڭ نورماتيۆتىك قاۋلىسىنا سايكەس، نارەستەنى توڭازىتقىشقا سالىپ، ونىڭ تىنىس الۋىنا مۇمكىندىك بەرمەگەنى ەرەكشە قاتىگەزدىككە جاتادى. "باسقا قىلمىستى جاسىرۋ ماقساتىندا" – قىلمىستىق كودەكسىنىڭ 317-بابى ("مەديسينا قىزمەتكەرىنىڭ كاسىبي مىندەتتەرىن تيىسىنشە ورىنداماۋى") بويىنشا قىلمىستى جاسىرۋ ماقساتىندا بالانى توڭازىتقىشقا سالدى.

اۋديو جازبانىڭ مازمۇنىنا سۇيەنسەك،  ەگەر ءسىز سۋعا سالعاندا، ساراپتاما بالانىڭ وكپەسىندە سۋ بولعانىن كورسەتەدى، سوندىقتان ولار توڭازىتقىشقا سالۋدى ۇيعارعان. بەلگىلى ءبىر ۋاقىت ىشىندە ءتىرى ءسابي دارمەنسىز كۇيدە بولدى، وعان كومەك كورسەتىلمەگەن. مىنە، وسى دالەلدەر ەسكەرىلىپ، نەگىزگە الىندى" دەپ مالىمدەگەن تەرگەۋشى.