ءسوز باسىن مەملەكەت باسشىسى قاسىم-جومارت توقايەۆتىڭ جولداۋىنان باستاعان باۋىرجان بايبەك، اتالعان قۇجاتتىڭ ماڭىزدى تۇستارىنا كەڭىنەن توقتالدى.

«بۇگىندە پاندەمياعا بايلانىستى كۇردەلى احۋالعا وراي جوسپارلاۋ شەگى مەن جۇرتتىڭ تالاپ-تىلەگىنىڭ شەڭبەرى بەلگىلى ءبىر دەڭگەيدە ايقىندالىپ قالعانىن كورىپ وتىرمىز. مەنىڭشە، پرەزيدەنت جولداۋى ەكى ءىرى بلوكقا جاۋاپ بەرەدى. بىرىنشىدەن، ول – ازاماتتارىمىزدىڭ قازىرگى سۇرانىسى. مۇنىڭ قازىرگىدەي بەلگىسىزدىك كەزەڭىندە ءتىپتى دە ماڭىزدىلىعى ارتادى. قاسىم-جومارت كەمە ۇلىنىڭ جولداۋىندا وسى ماسەلەگە ارنايى ءبولىم ارنالعان. مۇندا ەكونوميكانى دامىتۋ، جۇمىس ورىندارىن قۇرۋ، حالىقتىڭ تۇرمىسى تومەن توبىنا جاردەم بەرۋ سەكىلدى كەشەندى دە وزەكتى ماسەلەلەر قامتىلعان. سونىمەن بىرگە جولداۋ – مەملەكەتتىڭ ورتاشا مەرزىمدە دامۋ ماسەلەلەرىنە دە جاۋاپ بەرەتىن قۇجات. مۇندا جاڭا ەكونوميكالىق ساياساتتىڭ 7 نەگىزگى باسىمدىعى بەلگىلەنگەن. جولداۋ ناقتى رەفورماعا باعىتتالىپ، «حالىق ۇنىنە قۇلاق اساتىن مەملەكەت» تۇجىرىمداماسىن ناقتىلاي تۇسكەن. ياعني، مۇندا پرەزيدەنت بەرىك ساياسي ەرىك-جىگەر تانىتىپ، ساباقتاستىقتى جالعاستىرۋدا» - دەپ اتاپ ءوتتى پارتيا ءتوراعاسىنىڭ ءبىرىنشى ورىنباسارى.

سونىمەن بىرگە، پرەزيدەنت جولداۋىندا ايتىلعان اۋىل اكىمدەرىن سايلاۋ، مەملەكەتتىك باسقارۋدىڭ تيىمدىلىگىن ارتتىرۋ، ستراتەگيالىق جوسپارلاۋ اگەنتتىگىن قۇرۋ ماسەلەلەرى دە نازاردان تىس قالمادى. باۋىرجان بايبەك جولداۋدا ايتىلعان اۋىل اكىمدەرىن تىكەلەي سايلاۋدىڭ ماڭىزدى رەفورماعا باستايتىن وتە جاقسى باستاما ەكەنىن ايتىپ، سايلانعان اكىمنىڭ حالىققا كوبىرەك كوڭىل بولەتىنىن اتاپ كورسەتتى. اۋىل اكىمدەرى ەلىمىزدەگى اكىمدەردىڭ 90%-تەن استامىن قۇرايدى.

«پرەزيدەنت ايتقانداي، ءبىز حالىق ۇنىنە قۇلاق اساتىن مەملەكەتتى قۇرۋىمىز قاجەت. قازىرگىدەي كوروناۆيرۋس كەزىندە كوپ جەرلەردە جەرگىلىكتى باسشىلار، اۋدان، اۋىل اكىمدەرى كەيبىر ماسەلەلەردى شەشپەگەنىن، جاعدايعا ءمان بەرىپ، قامدانباعانىن كورىپ جاتىرمىز. حالىقتان ارىزدىڭ كوبەيۋى، ءتۇرلى ماسەلەلەر 1 ەمەس 100 رەت كوتەرىلسە، ارينە، ونى جۇيەلى پروبلەما دەپ ايتۋعا بولادى. سوندىقتان سايلانعان اكىمدەر وسى ماسەلەلەرگە كوبىرەك ءمان بەرىپ، كوڭىل بولەدى. 2015 جىلدان باستاپ ەلباسى باستاماسىمەن 5 ينستيتۋسيونالدىق رەفورما اياسىندا اكىمدەردى، جالپى ماسليحات دەپۋتاتتارىن سايلاۋ باستالدى. ەندى تىكەلەي سونداي سايلاۋعا كوشەتىن بولامىز. قوعامداعى كەلەڭسىزدىكتەردى اشىق ايتىپ، ونىمەن كۇرەسەتىن ساياسي، قوعامدىق مادەنيەت قالىپتاستىرۋ قاجەت» - دەدى باۋىرجان بايبەك.

پارتيا ءتوراعاسىنىڭ ءبىرىنشى ورىنباسارى، اسىرەسە، ەلىمىزدىڭ ساياسي كەڭىستىگىندە قازىرگى كەزدە ءوتىپ جاتقان پرايمەريزدىڭ بارىسىنا باسا نازار اۋداردى.

«ەلباسى ەكى اپتا بۇرىن ءوزىنىڭ ۇندەۋىندە بىزگە ىشكى پارتيالىق ىرىكتەۋ - پرايمەريزدى اشىق، ءادىل، تەڭ جاعدايدا وتكىزۋ كەرەك دەپ تاپسىردى. ارينە، بۇل – جاڭا باستاما. پرايمەريز دەگەن ءسوزدى بىلمەۋشى ەدىك. ول – دۇنيە جۇزىندە قالىپتاسقان دەموكراتيالىق قۇرال، حالىقتىڭ سايلاۋى. ۇمىتكەرلەرىمىز دە حالىق الدىنا شىعىپ، ماسەلەلەردى كوتەرىپ، جەرگىلىكتى پروبلەمالاردى اشىق ايتادى. پرايمەريزدىڭ نەگىزگى ماقساتى – پارتياعا جاڭا ادامداردى اكەلۋ. ول – زامان تالابى»، - دەدى باۋىرجان بايبەك.

سۇحبات بارىسىندا اتقارۋشى بيلىككە، پارتياعا قاراتا سىن ايتىپ، قارسىلاس بولىپ جۇرگەن جانداردىڭ پرايمەريزگە قاتىسۋ مۇمكىندىگى جايلى دا ءسوز بولدى. وسى ورايدا، جۇيەنى سىرتتان ەمەس، ىشتەن عانا وزگەرتۋگە بولادى دەگەن پارتيا ءتوراعاسىنىڭ ءبىرىنشى ورىنباسارى ساياسي ۇيىم وپپونەنتتەرىنىڭ ءوز قاتارىنا قوسىلۋى پارتيالىقتاردى تەك قانا قۋانتاتىنىن العا تارتتى.

سونداي-اق، تەلە-سۇحباتتا ايەلدەر مەن جاستارعا ارناپ بەلگىلەنگەن كۆوتا جايى دا اڭگىمە ارقاۋىنا اينالدى.

«ايەل ازاماتتارعا، جاستارعا زاڭدا كورسەتىلگەن 30%-تىك كۆوتا بار. سايلاۋشىلاردىڭ 52%ء-ى – ايەل ازاماتتار، 40%-ى – جاستار. ال ماسليحاتتارعا كەلسەك، جاستاردىڭ ۇلەسى – 3% قانا. ديسبالانس كورىنىپ تۇر. سوندىقتان ەلباسىنىڭ تاپسىرماسى بويىنشا پارتيادا جاستارعا 20%-تىك، ايەلدەرگە 30% كۆوتا كوزدەلگەن. حالىقتىڭ جارتىسىنان كوبى ايەل ازاماتتار بولعاندىقتان، ولارعا جول اشىپ، الەۋمەتتىك ليفت جاساماساق، وندا حالىقتىڭ تەڭ جارتىسى ەكونوميكاعا ۇلەس قوسا المايدى. سوندىقتان ايەلدەرگە مۇمكىندىك بەرۋ ماسەلەسى قوعام ءۇشىن دە، مەملەكەت ءۇشىن دە ماڭىزدى» - دەدى باۋىرجان بايبەك.

پرايمەريزدىڭ تاعى ءبىر جاڭالىعى – «Nur Otan» پارتياسىنىڭ ءاربىر اۋدان، ءوڭىر، قالاعا ارناپ دايىنداعان 216 دامۋ باعدارلاماسى. پارتيا ءتوراعاسىنىڭ ءبىرىنشى ورىنباسارى جان-جاقتى الەۋمەتتىك زەرتتەۋلەر مەن مەملەكەتتىڭ ناقتى مۇمكىندىكتەرىنە نەگىزدەلە وتىرىپ ازىرلەنگەن بۇل قۇجاتتاردىڭ ەل دامۋىنا تيگىزەر اسەرى مەن ماڭىزىنا دا كەڭىنەن توقتالدى.

«بىزدە ناقتى پروبلەمالاردىڭ كارتاسى بار. سول كارتا بويىنشا ءبىز ءاربىر اۋدانعا، ءاربىر قالاعا، وڭىرگە جەكە باعدارلاما دايىندادىق. اعىلشىن تىلىمەن ايتقاندا، «كراۋدسورسينگ» دەگەن جاقسى دەموكراتيالىق قۇرال بار. كراۋدسورسينگ دەگەن – حالىقتىڭ پىكىرىن تىڭداۋ. الدىن-الا وسى باعدارلامالاردى دايىنداپ، حالىققا جاريا ەتەمىز. دوداعا تۇسكەن ازاماتتارىمىز وسى ماسەلەلەردى كوتەرەدى. سودان سوڭ كەرى بايلانىس ورناتىپ، حالىقتىڭ پىكىرىن تىڭدايدى، ونى جينايدى. پرايمەريزدەن كەيىن ونى بىزگە جەتكىزەدى. سوندىقتان وسى باعدارلامالاردى الدىن-الا بەرىپ، حالىقتىڭ ۇسىنىسىن جيناپ، ونى تاعى ءبىر رەت جەتىلدىرەمىز» - دەپ تۇيىندەدى باۋىرجان بايبەك.

ەستەرىڭىزگە سالا كەتەيىك، پرايمەريزگە قاتىسۋعا 11 مىڭعا جۋىق ادام ۇمىتكەر رەتىندە تىركەلگەن. ولاردىڭ ورتاشا جاسى – 43 جاس. پرايمەريزگە قاتىسۋعا تىركەلگەن كانديداتتاردىڭ 34%ء-ى – ايەلدەر. كانديداتتاردىڭ ۇشتەن ءبىرى – 35 جاسقا دەيىنگى جاستار. كانديداتتاردىڭ 72% – ءوزىن ءوزى ۇسىنۋشىلار. كونكۋرس ءبىر ورىنعا 18 ادامعا دەيىن جەتەدى (نۇر-سۇلتان قالاسىندا).

7 قىركۇيەكتەن باستاپ پرايمەريزدىڭ كەلەسى كەزەڭى – ۇگىت باستالادى. 14 – 30 قىركۇيەك ارالىعىندا جاريا پىكىرسايىستار وتەدى.