تارباعاتاي اۋدانىنا جۇمىس ساپارى بارىسىندا اۋرۋحانانىڭ ەكىنشى تولقىنعا دايىندىق بارىسىن شىعىس قازاقستان وبلىسىنىڭ اكىمى جەكە تەكسەردى.

«كۇزدە كوروناۆيرۋستىڭ ەكىنشى تولقىنى بولا ما، جوق پا دەپ كۇتىپ وتىرۋدىڭ قاجەتى جوق. ەڭ باستىسى، قانداي جاعدايدا دا دايىن بولۋىمىز كەرەك»، - دەگەن شقو اكىمى دانيال احمەتوۆتىڭ تاپسىرماسىن ورىنداۋ ماقساتىندا تارباعاتاي اۋداندىق اۋرۋحاناسىنىڭ قىزمەتكەرلەرى تىنباي ەڭبەك ەتۋدە.

بۇگىندە اۋرۋحانانىڭ قورىندا 29 وتتەگى كونسەنتراتورى، 4 وكپەنى جاساندى جەلدەتۋ اپپاراتى بار. وتتەگى ستانسياسىن ورنالاستىرۋ جوسپارلانىپ وتىر. بارلىق مەديسينا قىزمەتكەرىندە كوروناۆيرۋستىڭ ىقتيمال جاڭا تولقىنىندا سىرقاتپەن تۇسەتىن ناۋقاستاردى ەمدەۋ كارتاسى مەن الگوريتمى بار. ۆيرۋستىڭ قالاي تەز تارالاتىنىن مۇنداعىلار جاقسى بىلەدى. ءبىر ادامنىڭ پسر-تەستتى تاپسىرماي، تاكسيمەن كەلۋى اۋدانداعى 100-دەن استام ادامنىڭ Covid-19 جۇقتىرۋىنا سەبەپ بولدى. وكىنىشكە قاراي، مۇنداي جاعدايدىڭ الدىن الۋ مۇمكىن ەمەس. ءبىراق ەرتە باستان قام جاساپ، دايىندالۋعا بولادى.