AstraZeneca جانە وكسفورد ۋنيۆەرسيتەتى ازىرلەگەن كوروناۆيرۋستىق ۆاكسينانىڭ سوڭعى كلينيكالىق سىناقتارى قاتىسۋشىنىڭ كەرى رەاكسياسىنان كەيىن توقتاتىلدى. AstraZeneca ونى "تۇسىنىكسىز اۋرۋ" جاعدايىنداعى "ادەتتەگى" كىدىرىس دەپ سيپاتتادى.

ۆاكسينا سىناقتارىنىڭ ناتيجەسى بۇكىل الەمدە مۇقيات باقىلانادى. AstraZeneca-Oxford University ۆاكسيناسى الەمدە دامىپ كەلە جاتقان ونداعان ۆاكسينالاردىڭ اراسىندا مىقتى باسەكەلەس رەتىندە قاراستىرىلادى.

ۆاكسينا نارىقتا العاشقىلاردىڭ ءبىرى بولىپ، سىناقتىڭ 1 جانە 2 كەزەڭدەرىنەن ءساتتى وتكەن. سوڭعى اپتالاردا 3ء-شى كەزەڭ سىناعىنا 30،000 ادام قاتىسقان. قاتىسۋشىلار اقش، ۇلىبريتانيا، برازيليا جانە وڭتۇستىك افريكا تۇرعىندارى. BBC اقپاراتىنا سايكەس، ۆاكسينالاردىڭ 3ء-شى كەزەڭىندەگى سىناقتار كوبىنەسە مىڭداعان قاتىسۋشىلاردى قامتيدى جانە بىرنەشە جىلعا سوزىلۋى مۇمكىن.

ددسۇ نە دەيدى؟

دۇنيەجۇزىلىك دەنساۋلىق ساقتاۋ ۇيىمى (ددسۇ) "ۆاكسينانىڭ 180-گە جۋىق ۇمىتكەرى بۇكىل الەمدە سىناقتان ءوتىپ جاتىر، ءبىراق ولاردىڭ ەشقايسىسى كلينيكالىق سىناقتاردى ءالى اياقتاعان جوق" دەيدى.

ۇيىم بيىل ۆاكسينا تيىمدىلىگى مەن قاۋىپسىزدىگى بويىنشا نۇسقاۋلىققا سايكەس كەلەدى دەپ كۇتپەيدى، ويتكەنى ولاردى ءقاۋىپسىز تەكسەرۋگە ۋاقىت كەتەدى.

حالىقارالىق فارماسيەۆتيكالىق وندىرۋشىلەر فەدەراسياسىنىڭ باس ديرەكتورى توماس كۋەني دە وسىنداي پىكىرلەر ايتتى. 

جۇڭگو مەن رەسەيدىڭ ۆاكسيناسى قاي كەزەڭدە؟ 

وسىعان قاراماستان، جۇڭگو مەن رەسەي كەيبىر نەگىزگى جۇمىسشىلارعا وتاندىق ۆاكسينالاردى ەگۋدى باستاپ كەتكەن. ولاردىڭ بارلىعى ددسۇ تىزىمىندە كلينيكالىق زەرتتەۋلەرگە جاتقىزىلعان.

بۇعان دەيىن ددسۇ 7 ينستيتۋت ۆاكسينانى سىناۋدىڭ سوڭعى كەزەڭىنە جەتكەنىن جاريالاعان. سوڭعى كەزەڭگە جەتكەن ۆاكسينالاردى دايىنداعان ەلدەر قاتارىندا جۇڭگو (4 ينستيتۋت)، اقش (1 ينستيتۋت)، ۇلىبريتانيا (1 ينستيتۋت) جانە اۆستراليا (1 ينستيتۋت) بار ەكەندىگى حابارلانعان. ددسۇ رەسەيدىڭ كوروناۆيرۋس ۆاكسينالارى وزگە ۆاكسينالاردان ەداۋىر ارتتا قالعانى جايىندا ەسكەرتكەن. ءتىپتى ددسۇ رەسەي ۆاكسيناسىنان ساق بولۋعا شاقىرىپ، وسى ۋاقىتقا دەيىن رەسەيدە ەكىنشى نەمەسە ءۇشىنشى كەزەڭ سىناقتارى تىركەلمەگەنىن مالىمدەگەن.