جۋىردا عانا مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا توتەنشە جاعدايلار مينيسترلىگىن قايتا قۇرۋدى تاپسىرعان بولاتىن.
وسىعان وراي، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋسيالىق زاڭنىڭ 22-1 بابىنا سايكەس، يۋريي ءيليننىڭ كانديداتۋراسى ءماجىلىستىڭ بەيىندى كوميتەتىنە ۇسىنىلدى.
اعىمداعى سەسسيادا ماجىلىستە ەنگىزىلگەن مينيسترلەردى كەلىسۋدىڭ جاڭا نىسانىنا سايكەس، يۋريي يلين دەپۋتاتتاردىڭ سۇراقتارىنا جاۋاپ بەرىپ، ءوزىنىڭ جۇمىسىن ۇيىمداستىرۋ تۋرالى وي-پىكىرىن جەتكىزدى. 
اتاپ ايتقاندا، دەپۋتاتتار «كازاۆياسپاس» قىزمەتى، توتەنشە جاعدايلار تۋرالى ەسكەرتۋدىڭ دايەكتىلىگىن ارتتىرۋ، بەلسەندى شارالاردى ازىرلەۋ، وندىرىستىك، مۇناي، جارىلۋ ءقاۋپى جوعارى كاسىپورىنداردا ءورت قاۋىپسىزدىگىن قامتاماسىز ەتۋ بويىنشا جۇمىستاردىڭ تيىمدىلىگىن ارتتىرۋ ماسەلەلەرىن كوتەردى. سونىمەن بىرگە ءماجىلىس دەپۋتاتتارى پالاتانىڭ قاراۋىندا جاتقان زاڭ جوبالارى بويىنشا دەپۋتاتتىق كورپۋسپەن جەدەل ءوزارا جۇمىس ىستەۋدىڭ قاجەتتىلىگىنە نازار اۋداردى.
كوميتەت وتىرىسىنىڭ ناتيجەسى بويىنشا ءتيىستى قورىتىندى قابىلداندى. قۇجاتتا ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى يلين يۋريي ۆيكتوروۆيچتىڭ كانديداتۋراسىن قاراي وتىرىپ، ونى قازاقستان رەسپۋبليكاسىنىڭ توتەنشە جاعدايلار ءمينيسترى قىزمەتىنە تاعايىنداۋعا ۇسىنۋعا بولادى دەپ سانايدى.
پىكىر قالدىرۋ