اقتاۋ. قازاقپارات - ماڭعىستاۋدا «اۋىل» حالىقتىق دەموكراتيالىق پاتريوتتىق پارتياسىنىڭ ءتوراعاسى ءالي بەكتايەۆ ءوڭىردىڭ زيالى قاۋىم وكىلدەرىمەن كەزدەستى.
پارتيا ءتوراعاسى ساياسي ۇيىمنىڭ قوعامدىق قۇرىلىم رەتىندە بىرنەشە جىلدان بەرى ۇلتتىق قۇندىلىقتاردى دارىپتەۋ باعىتىندا اتقارعان جۇمىستارى مەن بولاشاق جوسپارلارى جايىندا ايتتى.
«قازاق حالقى ءۇشىن ۇلتتىق قۇندىلىقتارىمىزدىڭ نەگىزى اۋىل توپىراعىنان تامىر تارتادى. «اۋىل» پارتياسى 2016 جىلدان بەرى «اۋىلىم التىن تۇعىرىم» اتتى ادەبي-ونلاين كونكۋرسىن ۇيىمداستىرىپ كەلەدى. بۇگىنگە دەيىن وعان 100-دەن استام قالامگەر قاتىستى. اسىرەسە، جاستاردىڭ قىزىعۋشىلىعى جوعارى. جىل سايىن ادەبي كونكۋرسقا جىبەرىلگەن شىعارمالاردىڭ ىشىنەن ۇزدىكتەرى ىرىكتەلىپ الىندى. ناتيجەسىندە «التىن تۇعىر» اتتى ءۇش تومدىق جيناق جارىق كوردى. بيىلعى جىلدى ەسەپتەگەندە اۋىل تاقىرىبىنا ارنالعان ۇزدىك تۋىندىلاردىڭ كولەمى 12 تومدى قۇرادى»،- دەدى ءالي بەكتايەۆ.
جيىنعا قاتىسۋشىلار ۇلتتىق قۇندىلىقتارعا قاتىستى كوزقاراستى قايتا قاراۋ قاجەتتىگىن ايتتى. سەبەبى، جاڭا زامان جاڭا ترەند، جاڭا تالاپ تۋعىزىپ وتىر. ماسەلەن، قوعام بەلسەندىسى، مەديا-مەنەدجەر ءانۋار بيماعامبەتتىڭ ايتۋىنشا، ۇلتتىق قۇندىلىقتاردى دارىپتەۋ ءۇشىن كەز كەلگەن ادام سول ۇلتتىق قۇندىلىقتارىمىزبەن ءومىر ءسۇرۋى ءتيىس.
«ۇلت دەگەن كوزقاراستىڭ وزىنە ءقازىر باسقاشا قارايتىن ۋاقىت كەلدى دەگەن العىشارت قويىلىپ جاتىر. كەز كەلگەن مەملەكەت ءوزىنىڭ ۇلتتىق يدەولوگياسىن قالىپتاستىرىپ جاسايتىن كەزدە، ۇلتتىق قۇندىلىعىنا باسىمدىق بەرەدى. سەبەبى ول مەملەكەتتىڭ تاۋەلسىزدىگىنە تىكەلەي اسەر ەتەدى. ءوزىنىڭ مودەلىن، مادەني وركەنيەتىن، ۇلت رەتىندەگى ەرەكشەلىگىن ساقتاعان مەملەكەتتەردە عانا بۇل ماسەلە ايتىلۋى مۇمكىن. ۇلتتىق قۇندىلىقتارعا مادەني-ماتەريالدىق مۇرا رەتىندە قاراماۋى ءتيىس. كەز كەلگەن قازاقستاندىق ۇلتتىق قۇندىلىقتاردى ساقتاي وتىرىپ، بۇگىنگى زامانمەن بايلانىستىرا وتىرىپ ءومىر ءسۇرۋى كەرەك»، -دەدى ءا. بيماعامبەت.
