قازاقستان كوممۋنيستىك حالىق پارتياسى نۇر-سۇلتان قالالىق كوميتەتىنىڭ كەڭسەسىندە حالىققا نەسيە راقىمشىلىعىن جاساۋ باستاماسىنا بايلانىستى وتىرىس وتكىزدى.

كەشە كوممۋنيستەر حالىقتىڭ، شاعىن جانە ورتا بيزنەستىڭ نەسيەگە باتىپ كەتكەنىن ايتىپ، پاندەمياعا دەيىن سالىقتى ۋاقىتىلى تولەگەن جەكە جانە زاڭدى تۇلعالارعا كەڭ كولەمدى نەسيە امنيستياسىن جاريالاۋدى ۇسىنعان.

پارتيانىڭ پارلامەنتىندەگى فراكسياسىنىڭ جەتەكشىسى ايقىن قوڭىروۆ ايتۋىنشا، قازىرگى زاڭناماعا سايكەس ازاماتتاردىڭ العان قارىزى ءۇشىن بانكتەر مەن ميكروقارجىلىق ۇيىمداردىڭ الدىنداعى جاۋاپكەرشىلىگى كۇشەيگەن. قارجىلىق ينستيتۋتتار قايتارىلماعان قارىزدار ءۇشىن ازاماتتاردىڭ قۇقىعىن شەكتەي الادى.

– كەيبىر قارجىلىق ينستيتۋتتار ازاماتتاردىڭ ەل ىشىندە قوزعالىسىن شەكتەۋگە دەيىنگى قۇزىرەتكە يە بولعان. ءتىپتى پويىز بەن ۇشاققا وتىرعىزباۋعا دەيىنگى جاعدايلار كەزدەسەدى. مۇنىڭ اقىرى ەكونوميكانى دەگراداسياعا ۇشىراتىنىن ەسكەرۋ كەرەك، – دەدى ول.

ايقىن قوڭىروۆتىڭ سوزىنە سەنسەك، بانك سەكتورىنىڭ ەكونوميكانىڭ شىنايى سەكتورىنداعى كۇشى باسىم.

– ەكونوميستەردىڭ ايتۋىنشا بۇل جاعداي ءقازىر ءوزىنىڭ لوگيكالىق تۇيىنىنە تاقاپ قالعان. وتكەن عاسىردا باتىس ەلدەرىنىڭ بانكيرلەرى مەن كاپيتاليستەرى ەكونوميكانىڭ باسىم بولىگىنىڭ نەسيەگە باتۋ ماسەلەسىمەن بەتپە-بەت كەلگەن. الايدا كەيىن سوۆەت بيلىگى قۇلاپ قالدى دا، جاڭا نارىقتارعا جول اشىلدى. تيىسىنشە، ولار بۇل جۇيەنى جالعاستىرۋ مۇمكىندىگىنە يە بولدى. ءبىراق بىزدەگى جاعدايدى ويلايىق. ءقازىر قازاقستان حالقىنىڭ 90 پايىزىندا نەسيە بار. ءقازىر كوپ ادامدا ەندى نەسيە الاتىن جاعداي دا جوق. سەبەبى جاڭادان قارىز الۋ ءۇشىن ەسكىسىن جابۋىڭ كەرەك. ال ەسكى نەسيەنى جابۋ ءۇشىن تابىسىڭ بولۋى ءتيىس. ال ديەۆالۆاسياعا بايلانىستى حالىقتىڭ تابىسى ءتۇسىپ كەتتى. سول سەبەپتى حالىقتا ونى جابار شاما دا جوق، – دەيدى ول.

دەرەككوز: inform.kz