ەلباسىنىڭ تاپسىرماسى بويىنشا «Nur Otan» حالىقپەن تالقىلاۋ ءۇشىن ءار ءوڭىر، قالا جانە اۋدان بويىنشا الداعى 5 جىلعا ارنالعان 216 سايلاۋالدى باعدارلاماسىنىڭ جوبالارىن جاريالادى. بيلەۋشى پارتيا ولاردى كراۋدسورسينگ قاعيداتى بويىنشا پىسىقتاماق. ياعني، رەسپۋبليكالىق پارتياىشىلىك پرايمەريزدىڭ ناتيجەلەرى بويىنشا ەڭ ۇزدىك يدەيالار مەن شەشىمدەردى جيناپ، باعدارلامالاردى جەتىلدىرۋ كوزدەلىپ وتىر.
سونىمەن، ەلوردادا سايلاۋالدى باعدارلامانىڭ جوباسى قالا تۇرعىندارىن تولعاندىراتىن ماسەلەلەردى قامتىعان نەگىزگى 10 باعىتتان تۇرادى. ولاردىڭ ىشىندە ۇلەسكەرلەردىڭ، كەزەكتە تۇرعانداردىڭ ماسەلەلەرىن شەشۋ، الەۋمەتتىك نىساندار سالۋ، قوعامدىق ورىنداردى جايلى ەتۋ سياقتى تاعى دا باسقا تۇيىتكىلدى ماسەلەلەر بار.
باعدارلاما اياسىندا كەزەكتە تۇرعان 47 مىڭعا جۋىق تۇرعىن مەن 13 مىڭ ۇلەسكەردى باسپانامەن قامتاماسىز ەتۋ جوسپارلانۋدا. 20 اپاتتى جانە ەسكى ۇيدە تۇراتىن 300 وتباسى جاڭا باسپاناعا كوشىرىلمەك. 16 تۇرعىن الابىندا 500 اۋلا اباتتاندىرىلىپ، الەۋمەتتىك نىساندار، جولدار مەن سۋمەن جابدىقتاۋ جەلىلەرى، 50 جاڭا ساياباق پەن گۇلزار سالىنادى.
پارتيانىڭ قالالىق فيليالى ءجيى سۋ باساتىن 34 پروبلەمالىق نىساندى باقىلاۋدا ۇستاپ وتىر. وسىعان بايلانىستى ارنايى نوسەرگە ارنالعان كارىز جەلىلەرى مەن قۇرىلىستارىن سالۋ جوسپاردا بار.
جاستارعا دا ايتارلىقتاي كوپ كوڭىل بولىنەدى. «ەلوردا جاستارى» تۇرعىن ءۇي باعدارلاماسىنا جىل سايىن قاراجات ءبولۋ كوزدەلىپ وتىر. ينتەرنات تۇلەكتەرى اراسىنان 1800 جاسقا تولىققاندى قولداۋ كورسەتىلەدى.
پارتيا مۇشەلەرى الماتىداعى باستى ماسەلەلەر رەتىندە ەكولوگيالىق احۋالدى جاقسارتۋ مەن قالانى كوگالداندىرۋ، كولىك جانە جاياۋ جۇرگىنشى ينفراقۇرىلىمىن سالۋدى قاراستىرىپ وتىر. سونداي-اق، تاياۋداعى بەس جىل ىشىندە 244 مىڭعا جۋىق جاڭا جۇمىس ورنىن اشۋ كوزدەلگەن.
الەۋمەتتىك سالاداعى ماسەلەلەردى شەشۋ ءۇشىن پارتيا 400 جەكەمەنشىك مەكتەپكە دەيىنگى ۇيىم اشۋ، 11 مەملەكەتتىك بالاباقشا جانە 8100 ورىندىق 7 مەكتەپ سالۋعا ۋادە بەرىپ وتىر. ستۋدەنت جاستاردى قولداۋ ماقساتىندا قالانىڭ 27 جوعارى وقۋ ورنى مەن كوللەدجدەرىندە 40 جاتاقحانا سالىنادى.
پارتيانىڭ شىمكەنت قالاسى بويىنشا سايلاۋالدى باعدارلاماسىنىڭ جوباسىندا حالىقتى تۇرعىن ۇيمەن قامتاماسىز ەتۋ ماسەلەسىنە ەرەكشە نازار اۋدارىلعان. ماسەلەن، 5 جىل ىشىندە 3 ملن.شارشى مەترگە جۋىق تۇرعىن ءۇي سالۋ جوسپارلانۋدا.
سونىمەن قاتار، پارتيا 42 مەكتەپ پەن 10 دەنساۋلىق ساقتاۋ نىسانىنىڭ قۇرىلىسىن جوسپارلاپ وتىر. جاستار مەن ايەلدەر كاسىپكەرلىگىن دامىتۋ ماقساتىندا «مەن كاسىپكەر بولامىن» وڭىرلىك باعدارلاماسىن ىسكە اسىرماق.
وڭىرلەردىڭ سايلاۋالدى باعدارلامالارىنىڭ جوباسىمەن تولىعىراق primaries.kz.سايتىنان تانىسۋعا بولادى.
پىكىر قالدىرۋ