بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Instagram-داعى ءوز پاراقشاسىندا جازدى.
"كۇنى كەشە ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆ تۇركىستان قالاسىندا بولىپ، ءبىرقاتار جاڭا نىسانداردى ارالادى. ەلباسىنىڭ تۇركىستان وبلىسىن قۇرىپ، ونىڭ ورتالىعى ەتىپ تۇركىستان قالاسىن بەلگىلەۋى – تاريحىمىزداعى ايتۋلى وقيعا.
بۇل بىلە بىلسەك، تۇتاس تۇركى الەمىنە كورسەتىلگەن قۇرمەت، بابالار رۋحىنا تاعزىم. ەلباسىنىڭ ءوزى ءبىر سوزىندە تۇركىستان – تۇگەل تۇركىنىڭ باستى ورداسى ەكەنىن تىلگە تيەك ەتتى. بۇل ءوڭىردىڭ تۋريستىك الەۋەتىن كوتەرەدى. سونىمەن قاتار وسى جۇمىستاردىڭ بارلىعى – الەۋمەتتىك ماسەلەلەرى شيەلەنىسكەن، حالقى تىعىز ورنالاسقان تۇركىستان ءوڭىرىن تۇلەتۋگە جاسالىپ جاتقان ۇلكەن قادام.
تۇركىستاننىڭ توعىز جولدىڭ تورابى رەتىندە دە مۇمكىندىگى زور. كورشىلەس وزبەكستانمەن جاساسقان كەلىسىمگە وراي تۇركىستان، تاشكەنت، سامارقاند، بۇحارا جانە حورەزم وبلىستارىنداعى تۋريستىك ورىندارعا بىرلەسكەن تۋريستىك مارشرۋت اشىلماق. سونىڭ ناتيجەسىندە تۇركىستان تاس جولمەن، اۋەجايمەن قامتىلعان، ەنەرگەتيكالىق تۇرعىدان دەربەس، گاز قۇبىرلارى تارتىلعان ءوڭىر بولماق. وسىنىڭ بارلىعى تەك قانا تاريحقا تاعزىم بولىپ قانا قويماي، جالپى ءوڭىردىڭ الەۋمەتتىك مۇمكىندىكتەرىن وسىرۋگە قولقابىس ەتەدى.
وسىلايشا، بارشا تۇركىنىڭ باستى ورداسى، قازاق حاندىعىنىڭ رۋحاني ورتالىعى، ەجەلگى استانامىز – تۇركىستان تۇلەپ جاتىر. ال، ءوز الدىنا رەسپۋبليكالىق ماڭىزى بار قالا مارتەبەسىن العان شىمكەنت شاھارى دامۋعا سەرپىن الىپ قانا قويماي، وڭتۇستىك وڭىردە تاعى دا ءبىر ۇلكەن، الەمدىك دارەجەدەگى ورتالىق بوي كوتەرۋدە. بۇل – ەلباسىنىڭ ەرەن ەڭبەگى.
جاڭا مارتەبە العالى بەرى كونە قالا الىپ قۇرىلىس الاڭىنا اينالدى. تاريحي قالانىڭ كەسكىن-كەلبەتى ادام تانىماستاي وزگەرىپ، ەڭسەسى كوتەرىلدى. ەلباسى ساپار بارىسىندا جاڭا نىسانداردىڭ اشىلۋ راسىمدەرىنە قاتىستى. ونىڭ ءبىرى – جىلىنا 3 ملن. جولاۋشى وتكىزۋگە قابىلەتتى بىرەگەي حالىقارالىق اۋەجاي.
ءىرى نىسانداردىڭ ىشىندە – 7000 ورىندىق «تۇركىستان-ارەنا» ستاديونى، 1000 ورىندىق «كونگرەسس حولل» كوپفۋنكسيونالدى كونسەرت زالى، «الاتاۋ مەديا-ورتالىعى»، «ۇلى دالا ەلى»، ۆيزيت ورتالىقتارى، مۋزەيلەر جانە تەاترلار بار. شاھارداعى بارلىق قۇرىلىس يۋنەسكو تاراپىنان ياساۋي كەسەنەسىنە قويىلاتىن تالاپتارعا ساي، ياعني كەسەنەنىڭ ەڭسەسىن تۇسىرمەيتىندەي ەتىپ سالىنۋدا.
جالپى تۇركىستان ءوڭىرى قازىرگى تاڭدا تۇلەپ جاتىر. بىرلىگى بەكەم، ىنتىماعى جاراسقان ەل. بۇل كەشەگى ارىس وقيعاسى كەزىندە دە كورىندى. كوكتەمدە سۋ باسۋدان زارداپ شەككەن ماقتاارال جاعدايىندا دا بايقالدى.
«Nur Otan» پارتياسى جارىلىستان زارداپ شەككەن ارىس قالاسى تۇرعىندارىنا #BizBirgemiz رەسپۋبليكالىق اكسياسى اياسىندا 600 ملن. تەڭگەدەن استام گۋمانيتارلىق كومەك كورسەتتى. ماقتارال اۋدانىنداعى توتەنشە جاعداي كەزىندە دە، ىندەت ورشىگەن ءتۇستا دا بارىنشا قول ۇشىن سوزدى.
پاندەميانىڭ سالدارىنان ورىن الىپ جاتقان داعدارىسقا قاراماستان، ەجەلگى قالا – تۇركىستان قارىشتاپ دامىپ جاتىر. بۇل – بەرەكە-بىرلىكتىڭ ارقاسى" دەدى ب.بايبەك Instagram-داعا جازباسىندا.
پىكىر قالدىرۋ