دەنساۋلىق ساقتاۋ ءمينيسترى الەكسەي سوي كوروناۆيرۋس پاندەمياسىنا بايلانىستى قازاقستاندا 5 قازاننان باستاپ ەنگىزىلەتىن جاڭا شەكتەۋلەر تۋرالى مالىمدەدى. بۇل تۋرالى ول ورتالىق كوممۋنيكاسيالار قىزمەتىندە وتكەن بريفينگتە ايتتى.
– ينفەكسيانىڭ الدىن الۋ ماقساتىندا ۆەدومستۆوارالىق كوميسسيا 2020 جىلدىڭ 5 قازانىنان باستاپ كەلەسى شەشىمدەردى قابىلدادى:
- باسقا ەلدەرمەن اۋە قاتىناسىن قالپىنا كەلتىرۋدى توقتاتا تۇرۋ؛
- اۋە قاتىناسى جاڭارتىلعان ەلدەرمەن رەيستەر سانىن كوبەيتپەۋ؛
- تۇركياعا رەيستەر سانىن ازايتۋ.
ەكىنشى ساناتتاعى ەلدەردەن كەلەتىن ازاماتتارعا مىناداي تالاپتار قويىلادى:
- تەرمومەترمەن ولشەۋ؛
- انكەتا تولتىرۋ؛
- كوروناۆيرۋس جۇقتىرماعانىن راستايتىن انىقتاما (ونىڭ الىنعانىنا ءۇش كۇننەن اسپاۋ كەرەك).
انىقتاما قاعازى بولماعان جاعدايدا ازامات كارانتين ستاسيونارىنا ەكى كۇنگە جاتقىزىلادى جانە COVID-19 انىقتايتىن لابوراتوريالىق تالداۋ جاسالادى. ناتيجەسى شىققان سوڭ، جۇقتىرعانى راستالسا، ينفەكسيالىق ستاسيونارعا جاتقىزىلادى، – دەدى مينيستر سوي.
ايتا كەتەيىك، ءىى ساناتتاعى ەلدەر قاتارىنا: شۆەيساريا، ۇلىبريتانيا، پولشا، يتاليا، ماجارستان، اۋستريا، نيدەرلاند، شۆەسيا، رۋمىنيا، چەحيا، گرەكيا، تۇركيا، ءباا، ساۋد ارابياسى، ءۇندىستان، ارمەنيا، رەسەي، وزبەكستان، ۋكراينا، قىرعىزستان، تاجىكستان ەلدەرى ەنگىزىلدى.
پىكىر قالدىرۋ