بۇعان دەيىن الماتى وبلىسى اكىمى باسپا ءسوز قىزمەتىنىڭ جەتەكشىسى قىزمەتىندە جەتىسۋ جۇرتىنىڭ ءۇنىن باسشىلىققا جەتكىزىپ، بيلىك پەن بۇقارا اراسىنا التىن كوپىر ورناتا بىلگەن عالىمۇرات جۇكەل الماتى وبلىسى اكىمىنىڭ كەڭەسشىسى قىزمەتىنە تاعايىندالدى.

عالىمۇرات جۇكەل 1987 جىلى 4 جەلتوقساندا مونعوليا حالىق رەسپۋبليكاسىنىڭ استاناسى ۇلانباتىر قالاسىندا دۇنيەگە كەلگەن. ءار جىلدارى "تالدىقورعان"، "جەتىسۋ" گازەتتەرىندە ءتىلشى، 2014 جىلى تالدىقورعان قالاسى اكىمىنىڭ باسپا ءسوز حاتشىسى قىزمەتىن اتقارعان.

2017-2020 جىلدىڭ شىلدە ايى ارالىعىندا الماتى وبلىسى اكىمىنىڭ باسپا ءسوز قىزمەتىنە جەتەكشىلىك ەتتى.

عالىمۇرات جۇكەل وسى ءۇش جىلدا كوپتىڭ ەسىندە جۋرناليستەر ءۇشىن اشىقتىعىمەن، وتكىر دە وزەكتى ماسەلەلەردى دەر كەزىندە باسشىلىققا جەتكىزىپ، سونىڭ وڭ شەشىلۋىنە ۇيىقتى بولۋىمەن ەستە قالدى. ونىڭ باسپا ءسوز حاتشىسى قىزمەتىن كىرىسكەنىن كەزىندە بەلگىلى جۋرناليست، كوكتەمدە دۇنيەدەن وتكەن بەيسەن قۇرانبەك سۇيىنشىلەپ حابارلاعان ەدى.

"تانىمايتىندار بولسا – تاني جۇرىڭىزدەر: عالىمۇرات جۇكەل دەگەن ازامات وسى. الماتى وبلىسى اكىمىنىڭ جاڭا ءباسپاسوز-حاتشىسى. تەلەارنانىڭ دا، گازەتتىڭ دە، سايتتىڭ دا جۇمىسىن بىلەدى. قالالىق اكىمدىكتە باسپا ءسوز –حاتشىسى دا بولعان. بلوگگەرلىگى جانە بار. ءبىر سوزبەن ايتقاندا ءبىلىمدى، بىلىكتى مامان. سوعان قاراماستان، جاسىنىڭ كىشىلىگىن، شاكىرتتىگىن پايدالانىپ دوسەكەڭ ەكەۋمىز "جاقسى ءباسپاسوز-حاتشىسى قانداي بولۋ كەرەك" دەگەن تاقىرىپتا اقىل ايتىپ كەتتىك" دەپ جاڭا قىزمەتتە اقجول تىلەگەن-دى مارقۇم جۋرناليست.

عالىمۇرات جۇكەل بۇل قىزمەتتەن كەتكەندە بەيسەن قۇرانبەكتىڭ سەنىمىنە سەلكەۋ تۇسپەگەنىن جەلىدە جازىلعان جازبالار-اق كورسەتتى.

سونىڭ بىرىندە جۋرناليست قانات ءابىلقايىر جاڭا قىزمەتكەردى و باستا ونشا جاقتىرماعانىن، ارتىنشا ءوزىن ىسكەرلىگىمەن دالەلدەي بىلگەنىنە كۋا بولعانىن ايتتى.

"عالىمۇرات جۇكەل باۋىرىمدى باستاپقىدا اسا جاقتىرا قويماعان ەدىم. ونى العاش الدەبىر الاڭعاسار ءمينيستردىڭ شاش ال دەسە باس الاتىن "پرەسسەگىنىڭ" قاسىنان كورگەننەن كەيىن بە، ايتەۋىر بىردەن بۇيرەگىم بۇرا قويعان جوق. كەيىننەن تەلەفونمەن بىرنەشە ارىپتەستىك اڭگىمەلەر بولدى. كوبىنە مەسەلىن قايىرىپ تاستاپ وتىردىم. سويتسە دە، ءبىز كوتەرگەن بارلىق پروبلەماعا بەل شەشە كىرىسىپ كەتەتىنىن كورە-كورە، ىشتەي ريزا بولا باستاعانىمدى ءوزىم دە اڭعارماي قالسام كەرەك. ريزا بولعاندا دا، بۇل جىگىتپەن جەكە باستىڭ اڭگىمەسىن ايتقان ەمەسپىز.

وبلىس اكىمىنە "اقتى – اق، قارانى – قارا" دەپ ايتا الاتىن. جانە ءبىزدىڭ ايتقانىمىز قوسپاسىز اكىمگە جەتىپ جاتاتىن. ول سوسىن وڭىنان شەشىلەتىن. بۇل شىنىن ايتقاندا اماندىق باتالوۆ اعامىزعا تەك + بولعانىن قاجەت بولسا ناقتى فاكتىمەن دالەلدەپ بەرە الامىن.

قوش، كوپ اكىمنىڭ قاتارداعى باسپا ءسوز حاتشىسى تۋرالى ودا ايتىپ جاتساق، ەل تۇسىنبەي قالار. دەسە دە، شىن نيەتپەن ەلگە قىزمەت ەتكەن مەمقىزمەتكەردىڭ دە ارتىنان جاقسى اڭگىمە قالاتىنىن وزگەلەر دە بىلە جۇرسە دەگەن نيەتپەن بىرەر ءسوز جازدىق. كوپ كورمەگەيسىزدەر!" دەپ جازدى جۋرناليست.

سول كەزدە وسى مازمۇنداس جازبالار الەۋمەتتىك جەلىدە از بولمادى.

جاڭا قىزمەتكە تاعايىندالعانى تۋرالى جاڭالىقتان كەيىن دە جاعىمدى جازبالار ءبىرشاما جازىلىپ جاتىر.

ءوز كەزەگىندە قامشى پورتالى دا عالىمۇرات جۇكەلدى وسى ۇدەدەن ۇنەمى كورىنەتىنىنە سەنىم بىلدىرە وتىرىپ، جاڭا قىزمەتكە كىرىسۋىمەن قۇتتىقتايدى.