قىرعىزستاندا 4 قازاندا وتكەن پارلامەنت سايلاۋىنىڭ ناتيجەسىمەن كەلىسپەگەن ازاماتتاردىڭ بىشكەكتەگى نارازىلىق اكسياسىنىڭ سوڭى جاپپاي تارتىپسىزدىككە ۇلاستى، دەپ حابارلادى سەيچاسKG تەلەگرام كانالى.

قارسىلىق اكسيالارى ەل استاناسىنان بولەك، تالاس جانە قاراكول سەكىلدى بىرنەشە قالادا بولعان.

5 قازاندا كۇندىز نارازىلىققا شىققان ازاماتتار سايلاۋ قورىتىندىسىنىڭ كۇشىن جويىپ، جاڭا سايلاۋ وتكىزۋدى تالاپ ەتكەن.

ارتىنشا سايلاۋعا قاتىسقان 16 پارتيانىڭ 11ء-ىنىڭ وكىلى مەموراندۋمعا قول قويىپ، سايلاۋدى قايتادان وتكىزۋ تۋرالى تالاپتارىن ايتتى.

بيلىكتىڭ "تاراڭدار" دەگەنىنە قاراماستان بىشكەكتىڭ ورتالىق الاڭىنا جينالعان ادام سانى ءسات-سايىن ارتىپ جاتتى.

ميتينگكە شىققاندار اراسىندا ماس كۇيدەگى ازاماتتاردىڭ دا بولعانى حابارلاندى. 

وقيعالار جەلىسىنىڭ ارى قارايعى حرونيكاسى تومەندەگىدەي:

20:22. ميتينگشىلەر اق ءۇي قاقپاسىنا باسىپ كىرمەك بولدى. اسكەر كەدەرگى كەلتىرگەن جوق.

20:25. اق ۇيگە تاس اتقىلاي باستادى. 

وسى ساتتە اسكەر دىبىس زورايتقىش گرانات پەن گاز كومەگىمەن ەرەۋىلشىلەردى اق ءۇيدىڭ ماڭىنان شەگىندىردى. ۇزاماي الاڭدا ۇيالى بايلانىس اجىرادى. اسكەر ميتينگشىلەردى تاراتۋعا تىرىستى.

ەرەۋىلشىلەر شەگىنىپ بارا جاتىپ، ارنايى جاساققا تاس اتقىلاپ جاتتى.

وسى كەزدە جارالانعاندار تۋرالى اقپارات شىعا باستادى. اراسىندا دەپۋتات جانار اكايەۆ، پوليسيا قىزمەتكەرى بار.

ميتينگشىلەر تارتىپسىزكە كوشىپ، جولىنداعىنى قيراتا باستادى. پوليسيا كولىگىنىڭ توڭكەرىلىپ جاتقان سۋرەتى تارالدى.

وسى ۋاقىتتا ەلدىڭ كەلەسى قالاسى قاراكولدە دە نارازىلىق اكسيالارى باستالىپ، ازاماتتارتى بىشكەككە اتتانۋعا شاقىرعان ۇراندار تاستالدى. 

ارتىنشا ەل پرەزيدەنتى سوورونباي جەەنبەكوۆتىڭ سايلاۋعا قاتىسقان 16 پارتيا كوشباسشىلارىمەن 6 قازاندا ساعات 09:00-دە كەزدەسەتىنى حابارلاندى.

ەلدىڭ ىشكى ىستەر مينيسترلىگى پارتيا وكىلدەرىنە ميتينگكە شىققانداردى تاراۋعا ۇگىتتەۋگە شاقىردى.

ءبىراق ازاماتتار تاراي قويمادى. كەرىسىنشە جەدەل جاردەم بەكەتىنىڭ شىعىس قاقپالارىن بوگەپ، تاس اتقىلادى. 6 جەدەل جاردەم كولىگىن اۋدارىپ تاستادى.

ۇزاماي 100 دەن استام ادامنىڭ ءتۇرلى دەنە جاراقاتىمەن اۋرۋحاناعا تۇسكەنى حابارلاندى.

ەرەلۋىل بولىپ جاتقان ايماقتا تولىقتاي ۇيالى بايلانىس بۇعاتتالدى.