ەلباسىنىڭ "اباي اماناتى" اتتى ماقالاسىن ءبىر دەممەن وقىپ شىقتىم. تۋىندى تۇڭعىش پرەزيدەنتىمىزدىڭ ابايدى العاش تانىعان كەزىنەن باستالىپ، ۇلى ويشىلدىڭ وسيەت سوزدەرىمەن ورىلگەن. ماقالانى وقۋ ارقىلى ەلباسى ومىرىنە، ونىڭ ىشىندە ەل باسقارۋداعى ىس-ارەكەتىنە اقىننىڭ عيبراتتارى قانشالىقتى اسەر ەتكەنىن بۇرىنعىدان دا جاقىنىراق بىلدىك دەۋگە بولادى.
شىن مانىندە، نۇرسۇلتان ءابىش ۇلىنىڭ ءار يگى باستاماسى دانىشپاننىڭ ونەگەسىنە تابان تىرەيدى. وعان ەلباسىنىڭ قازاقستان حالقى اسسامبلەياسىن قۇرۋ تۋرالى شەشىمى ابايدىڭ "ادامزاتتىڭ ءبارىن ءسۇي باۋىرىم دەپ..." دەگەن قاعيداسىمەن ۇندەسۋى ايقىن دالەل.
ءتىپتى ەلباسى ماقالادا قازاقستان رەسپۋبليكاسىنىڭ پرەزيدەنتى رەتىندەگى وكىلەتتىگىن ءوز ەركىمەن توقتاتۋ تۋرالى شەشىمدى قابىلداماس بۇرىن بولاشاقتا ەل تىزگىنىن ۇستايتىن ازاماتقا ابايشا قاراپ، ابايشا باعا بەرگەنىن ايتادى. وسىنىڭ ءوزى اباي مۇراسىنىڭ ماڭگىلىك ەكەنىن دالەلدەيتىن دۇنيە.
نۇرسۇلتان ءابىش ۇلى عۇلامانىڭ 150 جىلدىق مەرەيتويىن حالىقارالىق دەڭگەيدە اتاپ ءوتۋدىڭ ەلدىك، ەگەمەندىك تۇرعىسىنان قانشالىق ماڭىزدى بولعانىن دا نازاردان تىس قالدىرماي، سول كەزدەگى ءبىرقاتار ەستەلىكتەرگە توقتالىپ وتكەن. وقىپ وتىرىپ، ابايداي دارا تۇلعانىڭ مەرەيتويى توي تويلاۋ ءۇشىن ەمەس، وي ويلاۋ ءۇشىن قاجەت دەگەن قاعيدانىڭ دۇرىستىعىنا ودان ءارى كوز جەتكىزە تۇسەسىڭ.
ەلباسى ماقالادا: «كەيدە ءبىزدىڭ بۋىن ءومىر بويىنا ۇلى اباي مەكتەبىنەن، ياعني عۇلامانىڭ مۇحيتتاي شالقار وي قازىناسىنان تولاسسىز ءبىلىم الىپ كەلە جاتقانداي كورىنەدى»، – دەيدى. ءبىز وسى ءۇردىستى لايىقتى جالعاستىرۋىمىز قاجەت. ياعني، ابايدىڭ اقىل دارياسى ۇلتىمىزدىڭ بۇگىنگى بۋىنى ءۇشىن دە جانە بولاشاق ۇرپاق ءۇشىن دە اينىماس باعىت-باعدارعا، ومىرلىك شامشىراققا اينالۋى كەرەك. بۇل – كەمەل كەلەشەكتىڭ بىردەن ءبىر كەپىلى.
ماۋلەن اشىمبايەۆ،
ق ر سەناتىنىڭ ءتوراعاسى
Facebook پاراقشاسىنان
پىكىر قالدىرۋ