قىرعىزستان پرەزيدەنتى سوورونباي جەەنبەكوۆ ەلدەگى بولىپ جاتقان قاقتىعىسقا قاتىستى ۇندەۋ جاسادى.
– قىرعىزستان ەڭ قيىن كەزەڭدى باستان وتكەرىپ جاتىر. ەشقانداي بيلىك نەمەسە لاۋازىم ادام ومىرىنەن جوعارى بولا المايدى. وزدەرىڭىز بىلەتىندەي، ادام ومىرىنە ءقاۋىپ توندىرمەي، "اق ءۇي" عيماراتىنا باسىپ كىرگەندەرگە كۇش قولدانۋ تۋرالى بۇيرىق بەرگەن جوقپىن. سول كۇندەرى نارازىلىق بىلدىرۋشىلەردى كۇشپەن باسۋ تۋرالى ۇسىنىستار دا بولدى. مەن بۇدان ۇزىلدى-كەسىلدى باس تارتتىم. بۇل قاقتىعىسقا اكەپ سوعادى. سوندىقتان توتەنشە جاعداي ەنگىزۋ تۋرالى جارلىققا قول قويمادىم.
وڭىرلەردە مەنى قولداپ، ميتينگىلەردە دە ءسوز سويلەگىسى كەلەتىن كوپتەگەن وتانداستار بولدى. مەن ولاردان بۇلاي جاساماۋىن ءوتىندىم. قىزمەتكە ورنالاسقىسى كەلگەندەر دىتتەگەن ماقساتىنا جەتتى.
ەندى ءبىز كوشەدە اكسيانى جالعاستىرىپ جاتقانداردى توقتاتۋىمىز كەرەك. مەن ۇيىمداستىرۋشىلاردى جانە ساياسي كوشباسشىلاردى زاڭعا باعىنۋعا شاقىرامىن! وسىنداي قيىن ساتتە ازاماتتىق ۇستانىمىن كورسەتكەن جاستارعا زور ريزاشىلىعىمدى بىلدىرەمىن.
ءبىز بۇل جاعدايدان بىرگە شىعاتىنىمىزعا سەنىمدىمىن. قۇرمەتتى وتانداستار، بۇگىندە ەڭ وزەكتى مىندەت – قىرعىزستاندا بەيبىتشىلىك پەن قوعامدىق ءتارتىپتى قامتاماسىز ەتۋ! ءبىز بىرلەسىپ بۇل جاعدايدان شىعامىز دەپ سەنەمىن! ءبارىمىز ءۇشىن ەلدىڭ مۇددەسى ماڭىزدى، – دەدى پرەزيدەنت سوورونباي جەەنبەكوۆ.
پىكىر قالدىرۋ