اقتوبەدە بۇرىنعى ايەلىنە قول جۇمساعان ەر ادامعا سوت ۇكىمى شىعارىلدى، دەپ حابارلادى اقتوبە قالاسىنىڭ №2 سوتىنىنىڭ باسپا ءسوز قىزمەتى.

"نە مولچي" قوعامدىق قورى الەۋمەتتىك جەلىدەگى پاراقشاسىندا ايەلىنىڭ بەتىن كەسكەن ساكەن بەكەنوۆتىڭ 4 جىلعا سوتتالعانىن جازدى.

"اقتوبەدە سوت ساكەن بەكەنوۆكە ۇكىم شىعاردى! ول ايەلىنىڭ بەتىن كەسىپ تاستاعانى ءۇشىن 4 جىلعا سوتتالدى!" دەلىنگەن پاراقشاداعى جازبادا. 

اقتوبە قالاسىنىڭ №2 سوتى س .ە. بەكەنوۆكە قاتىستى قىلمىستىق كودەكستىڭ 106-بابى 1-بولىگى ("دەنساۋلىققا قاساقانا اۋىر زيان كەلتىرۋ") بويىنشا قىلمىستىق ءىستى قارادى.

"سوتتا 2020 جىلدىڭ 14 ناۋرىزىندا بەكەنوۆ ءوزىنىڭ بۇرىنعى ايەلى جۇمىس ىستەيتىن كافەدە ماس كۇيىندە وعان قول جۇمساعانى، بەتى مەن بىلەگىنىڭ بىرنەشە جەرىنەن كەسكىلەگەنى ايتىلدى. بەكەنوۆتىڭ كىناسى جابىرلەنۋشى مەن كۋاگەرلەردىڭ ايعاقتارى، ساراپتاما قورىتىندىلارى ارقىلى دالەلدەندى.

جابىرلەنۋشى سوتتالۋشىنى كەشىرىپ، باس بوستاندىعىنان ايىرماۋدى سۇرادى. الايدا سوت ايەلگە قاتىستى جاسالعان قىلمىستىڭ قاتىگەزدىگىن، سونداي-اق بۇل قىلمىستىڭ اۋىر جاعداي – ماس كۇيىندە جاسالعانى ايتىلدى" دەلىنگەن حابارلامادا.

وسىعان بايلانىستى سوت بەكەنوۆ قوعام ءۇشىن ءقاۋىپتى جانە ونى وقشاۋلاۋ كەرەك دەگەن قورىتىندىعا كەلدى. سوت ۇكىمى زاڭدى كۇشىنە ەنگەن جوق.