«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك پرايمەريزدىڭ كەلەسى كەزەڭدەرى تۋرالى ايتىپ، Facebook جەلىسىندەگى پاراقشاسىندا ارنايى جازبا جاريالادى.

«قۇرمەتتى دوستار! وتكەن اپتادا «Nur Otan»-نىڭ پارتياىشىلىك سايلاۋىنىڭ ءبىرىنشى كەزەڭى اياقتالىپ، رەيتينگتىك داۋىس بەرۋ قورىتىندىسى جاريالاندى. وعان «پرايمەريز» اقپاراتتىق جۇيەسىندە تىركەلگەن پارتيا مۇشەلەرىنىڭ 662 687ء-سى نەمەسە 84،2%ء-ى قاتىستى.

وزدەرىڭىزگە ءمالىم، ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا كەمىندە 30% ايەلدەر مەن 20% – 35 جاسقا دەيىنگى جاستارعا بەرىلگەن كۆوتا ەسكەرىلىپ، ءماجىلىس پەن بارلىق دەڭگەيدەگى ءماسليحاتتارعا ارنالعان سايلاۋالدى پارتيالىق تىزىمدەر جاسالادى.

سوندىقتان بۇگىن Primaries.kz پورتالىندا قاتىسۋشىلاردىڭ جالپى رەيتينگتەرىمەن بىرگە، ايەلدەر مەن جاستار اراسىنان تۇسكەن كانديداتتاردىڭ رەيتينگتەرى دە جاريالاندى.

پارتياىشىلىك ىرىكتەۋدىڭ ەكىنشى دەڭگەيىندە اۋداندىق جانە قالالىق كونفەرەنسيالار وتكىزىلىپ، وندا ءتيىستى ءماسليحاتتار سايلاۋلارىنا ارنالعان پارتيالىق تىزىمدەر بەكىتىلەدى.

سونداي-اق، وسى كونفەرەنسيالاردا سايلاۋشى-دەلەگاتتار جاسىرىن رەيتينگتىك داۋىس بەرۋ جولىمەن جوعارى دەڭگەيدەگى وڭىرلىك ءماسليحاتتار مەن ماجىلىسكە ارنالعان پارتيالىق تىزىمدەرگە قوسۋ ءۇشىن ۇمىتكەرلەردى سايلايدى.

كانديداتتار الداعى پىكىرسايىستاردا تاعى دا باعىن سىنايدى. رەسپۋبليكالىق ماڭىزى بار قالالاردى قوسپاعاندا ماجىلىسكە ۇمىتكەرلەر ەكى رەت – اۋداندىق جانە وبلىستىق كونفەرەنسيالاردا پىكىرسايىسقا تۇسەدى.

پرايمەريز ەرەجەسىنە سايكەس پارلامەنتتىڭ تومەنگى پالاتاسىنداعى «Nur Otan» پارتياسىنىڭ قىزمەتتەگى دەپۋتاتتارى وبلىستىق پارتيالىق كونفەرەنسيالاردا ءۇشىنشى دەڭگەيدەگى پارتياىشىلىك ىرىكتەۋگە قاتىسا الادى.

وبلىستىق ءماسليحاتتارعا پارتيالىق تىزىمدەر ءتيىستى كونفەرەنسيالاردا، ال ماجىلىسكە ارنالعان قورىتىندى ءتىزىم – «Nur Otan» سەزىندە بەكىتىلەدى.

اشىقتىق پەن ايقىندىقتى قامتاماسىز ەتۋ ءۇشىن پرايمەريزدىڭ بارلىق كەزەڭى پارتيانىڭ سايتىندا، سونداي-اق ب ا ق پەن الەۋمەتتىك جەلىلەردە جاريالانادى»، – دەپ جازدى ب.بايبەك.