7 قازاندا رەسەيدىڭ ريازان وبلىسى جەلتۋحينو اۋىلىنىڭ جانىنداعى وق-دارىلەر قويماسىندا ءورت شىعىپ، جالىن سول جەردە ساقتالعان سناريادتاردىڭ جارىلۋىنا اكەپ سوققان، دەپ حابارلادى تاسس اگەنتتىگى.

باتىس اسكەري وكرۋگى باسپا ءسوز قىزمەتىنىڭ حابارلاۋىنشا، وقيعادان از ۋاقىت بۇرىن اسكەري ءبولىم اۋماعىندا ءشوپ ورتەنگەن، ال قاتتى ەكپىندى جەل ءورتتى ارتيللەريالىق وق-دارىلەر ساقتالعان الاڭعا ايداعان.

اسكەري ءبولىمنىڭ شتاتتىق ءورت ءسوندىرۋ ءبولىمىنىڭ كۇشتەرىمەن ءورتتى سوندىرۋگە تىرىسقان، ءبىراق جالىندى الاۋىزدىقتاۋ مۇمكىن بولمادى.

ءبولىم اۋماعىنان قىزمەتكەرلەر مەن اسكەري قىزمەتشىلەردىڭ جەكە قۇرامى ەۆاكۋاسيالاندى.

كوپ ۇزاماي تجم ماماندارى جانىپ جاتقان قويمالاردان بىرنەشە شاقىرىم راديۋستا ورنالاسقان اۋىل تۇرعىندارىن ەۆاكۋاسيالاي باستادى. رەسمي مالىمەتتەر بويىنشا، 2 300-دەن استام ادام شىعارىلعان.

وق-دارىلەردەن شاشىراعان بولىكتەر اسكەري بولىمنەن ءۇش شاقىرىم جەردە ورنالاسقان كۋزمينكي-2 اۋىلىنداعى شوپكە ءتۇسىپ، ول جەردە دە ءورت شىققان.

ءورتتى سوندىرۋگە تجم قىزمەتكەرلەرى، سونداي-اق ونداعان اسكەري قىزمەتكەر، ارنايى اسكەري تەحنيكا جانە ەكى ءورت تانكىسى مەن بروندالعان ءورت ءسوندىرۋ اۆتوموبيلدەرى جۇمىلدىرىلعان. سونىمەن قاتار، تجم وقيعا ورنىنا ءورت پويىزىن جىبەرىپ، يل-76 ۇشاعى مەن ەكى مي-8 تىكۇشاعىن دايىندىققا الىپ كەلدى. سونداي-اق ءورتتى ءسوندىرۋ ءۇشىن ارنايى روبوتتار قولدانىلادى. ءتورت يل-76 ۇشاعى وقيعا ورنىنا جانە قورعانىس مينيسترلىگىنە جىبەرىلدى.

توتەنشە جاعدايلار قىزمەتىندەگى تاسس دەرەككوزىنىڭ ايتۋىنشا، ەكپىندى جەل وتپەن كۇرەستى قيىنداتقان. ءورتتىڭ تارالۋى جالعاسۋدا. جارىلىس ءار 20 سەكۋند سايىن بولىپ جاتىر.