قازاقستاندىقتار 42 500 تەڭگە الەۋمەتتىك تولەمىن قايتارۋعا مىندەتتى ەمەس. بۇل تۋرالى stopfake.kz سايتى حابارلادى.

سايتتىڭ مالىمەتىنشە، الەۋمەتتىك جەلىلەر مەن مەسسەندجەرلەردە توتەنشە جاعداي رەجيمىنە بايلانىستى تابىسىن جوعالتقاندارعا تولەنگەن 42 500 تەڭگە مولشەرىندەگى تولەمدەردى قايتارۋ قاجەت دەگەن اقپارات تاراعان بولاتىن. 

مەملەكەتتەن الىنعان قاراجاتتى قايتارۋعا بولعانىمەن، مىندەتتى تۇردە تالاپ ەتىلمەيدى. 

– توتەنشە جاعداي كەزىندە كەيبىر ادامدار ايلىق تابىسى جوعالماسا دا، الەۋمەتتىك تولەمدەردى زاڭسىز الدى. ولاردىڭ كەيبىرەۋى بۇل قاراجاتتى مەملەكەتكە قايتارۋ تۋرالى شەشىم قابىلدادى. تولەمدەر تولەنگەننەن بەرى شامامەن 180 000 ادام قاراجاتتى قايتاردى. بۇل ادامنىڭ ءوز ەركىنە قاراي جۇزەگە اسىرىلادى. ازاماتتاردى بۇل اقشانى قايتارۋعا مىندەتتەيتىن نورمالار مەن زاڭدار جوق، – دەپ ءتۇسىندىردى ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي وكىلى الەكساندر كونونەس.

الەۋمەتتىك كومەكتى قاتەلەسىپ العاندار قايتارۋى ءۇشىن Kaspi Bank ءموبيلدى قوسىمشاسىندا ءتيىستى فۋنكسيا ىسكە قوسىلعان. بۇگىندە ونىڭ قىزمەتى توقتادى.

– كارانتين كەزىندە تابىسىنان ايىرىلماسا دا، الەۋمەتتىك تولەم العاندار Kaspi.kz موبيلدىك قوسىمشاسى ارقىلى قاراجاتتى قايتاردى. بۇل تولەمدەردى قايتارۋ – ءاربىر ءار ازاماتتىڭ ەرىكتى شەشىمى، – دەپ جاۋاپ بەرگەن Kaspi Bank stopFake.kz پورتالى جولداعان ساۋالعا.