ءماجىلىس ءتوراعاسى نۇرلان نىعماتۋلين ءۇشجىلدىق بيۋدجەت جوباسىندا كوزدەلگەن سەمينارلار مەن سيمپوزيۋمدارعا جۇمسالاتىن شىعىنداردى قىسقارتۋعا، ال ۇنەمدەلگەن قاراجاتتى الەۋمەتتىك قاجەتتىلىكتەرگە قايتا بولۋگە بولادى دەپ ەسەپتەيدى.

وسى ماسەلەنى پالاتا سپيكەرى، ماجىلىستەگى «Nur Otan» فراكسياسىنىڭ جەتەكشىسى نۇرلان نىعماتۋلين 2021-2023 جىلدارعا ارنالعان رەسپۋبليكالىق بيۋدجەت جوباسىن فراكسيا وتىرىسىندا الدىن الا تالقىلاۋ بارىسىندا جۇمىس توبىنا مۇددەلى مەملەكەتتىك ورگاندارمەن بىرلەسىپ پىسىقتاۋدى تاپسىردى.

- بيۋدجەتتى قاراۋ بارىسىندا ءبىز ونىڭ تۇڭعىش پرەزيدەنت، ەلباسى، «Nur Otan» پارتياسىنىڭ كوشباسشىسى نۇرسۇلتان ءابىش ۇلى نازاربايەۆتىڭ جانە مەملەكەت باسشىسى قاسىم-جومارت توقايەۆتىڭ العا قويعان مىندەتتەرىن تولىق كولەمدە شەشىلۋىنە قول جەتكىزۋىمىز كەرەك. بۇل رەتتە ءبىز كوروناۆيرۋس پاندەمياسى سالدارىنان الەمدىك ەكونوميكادا قالىپتاسقان قازىرگى كۇردەلى جاعدايدى نەگىزگە الۋعا ءتيىسپىز. ءۇش جىلدىق بيۋدجەت ءدال وسى جاعدايلاردى ەسكەرە وتىرىپ قالىپتاستىرىلۋى ءتيىس، - دەپ اتاپ ءوتتى نۇرلان نىعماتۋلين.

وسىعان بايلانىستى دەپۋتاتتار قاراجاتتىڭ ءبىر بولىگىن اسا ماڭىزدى باعىتتارعا قايتا ءبولۋدى ۇسىندى.

اتاپ ايتقاندا، بۇل كونسالتينگتىك قىزمەتتەرگە، سونداي-اق ءارتۇرلى سەمينارلار، كونفەرەنسيالار، سيمپوزيۋمدار وتكىزۋگە بولىنگەن قاراجاتتارعا قاتىستى.

زەرتتەۋلەر مەن كونسالتينگتىك قىزمەتتەردىڭ ءبىر بولىگى شىن مانىندە قاجەت ەكەندىگىمەن كەلىسە وتىرىپ، ءماجىلىس ءتوراعاسى قازىرگى زامانعى بايلانىس قۇرالدارى، اتاپ ايتقاندا، بەينەكونفەرەنسيا فورماتى كوپتەگەن ءىس-شارالاردى، سونىڭ ىشىندە حالىقارالىق ءىس-شارالاردى كوپ شىعىنسىز ءتيىمدى وتكىزۋگە مۇمكىندىك بەرەتىنىنە توقتالدى.

- سەمينارلار مەن سيمپوزيۋمداردى جانە باسقا دا ءىس-شارالاردى وتكىزۋدى قالىپتاسقان جاعداي تۇراقتانعانعا دەيىن شەگەرۋگە بولادى. قاراجاتتاردى نەعۇرلىم ماڭىزدى الەۋمەتتىك جوبالارعا ءبولۋدى قاراستىرۋ قاجەت، - دەدى نۇرلان نىعماتۋلين.

دەپۋتاتتار مەملەكەت باسشىسىنىڭ تاپسىرماسىن ورىنداۋعا ءۇش جىل ىشىندە اۋىلدى فەلدشەرلىك-اكۋشەرلىك پۋنكتتەر مەن دارىگەرلىك امبۋلاتوريالارمەن قامتاماسىز ەتۋ ماسەلەسىن كوتەردى. دەپۋتاتتاردىڭ الاڭداۋشىلىعىن ۇكىمەت ءالى كۇنگە دەيىن وسىنداي مەديسينالىق پۋنكتتەرگە وڭىرلەردىڭ ناقتى قاجەتتىلىكتەرى تۋرالى دەرەكتەردىڭ جوقتىعىنان تۋىنداتىپ وتىر. وسىعان بايلانىستى قاراستىرىلىپ وتىرعان ءۇش جىلدىق بيۋدجەتتە وسىنداي تارماقتاردى قۇرۋ ءۇشىن ناقتى قارجىلىق ۇسىنىستار جوق.

ءماجىلىس سپيكەرى اۋىلداردا جاڭا فەلدشەرلىك-اكۋشەرلىك پۋنكتتەر سالۋدى جەدەلدەتۋ قاجەتتىگىن اتاپ ءوتىپ، بۇل ماقساتتارعا قاراجات كوزدەلۋى ءتيىس ەكەنىن ايتتى.

نۇرلان ءنىعماتۋليننىڭ پىكىرىنشە، كۆازيمەملەكەتتىك سەكتورمەن يگەرىلمەگەن جانە قازىناشىلىق شوتتاردا جاتقان قاراجاتتىڭ ءبىر بولىگىن وسى باعىتقا قايتا بولۋگە بولادى

اعىمداعى جىلدىڭ قىركۇيەك ايىنىڭ سوڭىندا قازىناشىلىق شوتتاردا 78 ملرد. تەڭگەدەن استام قاراجات بار. ءماجىلىس دەپۋتاتتارى اتاپ وتكەندەي، قازىناشىلىق شوتتارداعى اقشا ەكونوميكاعا جۇمىس ىستەمەيدى جانە بيۋدجەتتىڭ كىرىس بولىگىن تولىقتىرمايدى.

سونىمەن قاتار ماجىلىستەگى «Nur Otan» فراكسياسىنىڭ وتىرىسىندا بيۋدجەت جوباسىن تالقىلاۋ بارىسىندا دەپۋتاتتار اۋىلدى سۋمەن قامتاماسىز ەتۋ جوبالارىن قارجىلاندىرۋ ءۇشىن دە شىعىستاردى ۇلعايتۋدى ۇسىندى.

ءماجىلىس سپيكەرىنىڭ پىكىرىنشە، اۋىلداردى اۋىز سۋمەن قامتاماسىز ەتۋ بيۋدجەت باسىمدىقتارىنىڭ ءبىرى بولۋعا ءتيىس.

- ءاربىر پروبلەمانىڭ ارتىندا ازاماتتارىمىز تۇرعانىن ەستە ساقتاۋ قاجەت. ءماجىلىستىڭ جالپى وتىرىسىندا ءۇشجىلدىق بيۋدجەت جوباسى قارالعانعا دەيىن وسى ايتىلعان ولقىلىقتاردىڭ ورنىن تولتىرۋ قاجەت. «Nur Otan» فراكسيا جۇمىسىنىڭ باسىمدىعى پارتيا كوشباسشىسى، ەلباسىنىڭ جانە مەملەكەت باسشىسىنىڭ، سونداي-اق پارتيانىڭ سايلاۋالدى تۇعىرناماسىنىڭ تاپسىرمالارىن زاڭنامالىق قامتاماسىز ەتۋ. مۇنىڭ ءبارى ازاماتتارىمىزدىڭ ءومىر ءسۇرۋ ساپاسىن جاقسارتۋعا باعىتتالعان، - دەپ تۇيىندەدى ءسوزىن ءماجىلىس ءتوراعاسى نۇرلان نىعماتۋلين.