شىعىس قازاقستان وبلىسى ءۇرجار اۋدانى ماقانشى اۋىلىنداعى پوليسيا بولىمشەسىندە مال ۇرلىعى دەرەگى بويىنشا تەرگەلىپ جاتقان كۇدىكتى قايتىس بولدى. بۇل تۋرالى وبلىستىق پوليسيا دەپارتامەنتىنىڭ باسپا ءسوز قىزمەتى حابارلادى.

دەپارتامەنت باسپا ءسوز قىزمەتىنىڭ حابارلاۋىنشا، ۆەدومستۆو باسشىسى ساعات مادييەۆ جاعدايدى انىقتاپ تەكسەرۋ ءۇشىن ماقانشىعا كەلگەن.

– ىشكى ىستەر ءمينيسترىنىڭ تاپسىرماسى بويىنشا ورىن العان جاعدايدى انىقتاپ تەكسەرۋ ءۇشىن ارنايى كەلدىم. ماقانشى اۋىلىنىڭ پوليسيا بولىمشەسىندە 33 جاستاعى ەر ادامنىڭ قايتىس بولعانىن راستايمىن. ول مال ۇرلىعى بويىنشا كۇدىكتى رەتىندە پوليسيا بولىمشەسىنە جەتكىزىلگەن بولاتىن، – دەدى ول.
⠀
ساعات مادييەۆتىڭ باسقارۋىمەن ارنايى توپ قۇرىلدى. وقيعا بويىنشا وزىندىك قاۋىپسىزدىك باسقارماسى "قيناۋ" بابى بويىنشا سوتقا دەيىنگى تەرگەۋ جۇمىستارىن باستادى. پروسەسسۋالدىق پروكۋرورلاردىڭ توبى تاعايىندالدى.
⠀
"جاقىن تۋىستارىنىڭ قاتىسۋىمەن وقيعا ورنىنا قاراۋ جۇرگىزىلدى. قاجەتتى ساراپتامالار، ونىڭ ىشىندە پاتالوگواناتوميالىق زەرتتەۋلەر وتكىزىلدى، ازىرگە ساراپتاما ناتيجەلەرى دايىن ەمەس. قايتىس بولعان ازاماتتىڭ وتباسىنا ءۇرجار اۋدانىڭ اكىمىمەن بىرگە بارىپ، ونىڭ تۋىستارى مەن دوستارىنىڭ سۇراعى قارالىپ جاتىر.

جاقىن تۋىستارى مەن دوستارىنىڭ قايعىسىنا ورتاقتاسىپ، كوڭىل ايتامىن. كىنالى ادامدار زاڭمەن بەلگىلەنگەن جاۋاپكەرشىلىككە تارتىلادى. مەنىڭ پرينسيپتىك ۇستانىمىم – تەرگەۋدىڭ ءادىل، ءارى وبەكتيۆتى جۇرگىزىلۋى" دەدى دەپارتامەنت باسشىسى.

الەۋمەتتىك جەلىدە وقيعاعا قاتىستى ۆيدەو جاريالاندى. كادردان "ەكى بالاسى جەتىم قالدى"، "ايەلىنە، شەشەسىنە سىزدەر نە دەپ ايتاسىزدار؟ ءبىز ءولتىرىپ تاستادىق دەيسىزدەر مە؟"، "سۇيەگى قايدا؟ اعام قايدا؟" دەگەن سوزدەر ەستىلەدى.