مەشىتتە جاماعاتپەن بەس ۋاقىت ناماز وقۋعا رۇقسات بەرىلدى. بۇل تۋرالى muftyat.kz سايتى حابارلادى.
26 قازاندا پرەمەر-مينيستر اسقار ءماميننىڭ توراعالىعىمەن ەل اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) سەلەكتورلىق وتىرىسى ءوتتى. وتىرىس بارىسىندا كوميسسيا مەشىت جۇمىسىنا قاتىستى شەشىم قابىلدانعان.
"بيىل 2 قاراشادان باستاپ (جۇما نامازىن قوسپاعاندا) مەشىتتەردە ۇجىمدىق ناماز (بەس ۋاقىت ناماز) وتكىزۋگە رۇقسات ەتىلسىن" دەلىنگەن كوميسسيا شەشىمىندە.
ءبىراق زالدا 100 ادامنان ارتىق كىسى بولماۋى جانە 2 مەتر الەۋمەتتىك اراقاشىقتىق، ماسكا رەجيمى قاتاڭ سانيتارلىق-دەزينفەكسيالىق رەجيم ساقتالۋى ءتيىس.
قازاقستان مۇسىلماندارى ءدىني باسقارماسى مەشىتكە كەلۋشى جاماعاتتى سانيتارلىق-دەزينفەكسيالىق رەجيمدى قاتاڭ ساقتاۋعا شاقىرادى، سونىمەن قاتار كارانتين جاعدايىنا بايلانىستى قازىرگە جۇما نامازى وقىلمايتىنىن حابارلادى.
