ءبىلىم جانە عىلىم ءمينيسترى اسحات ايماعامبەتوۆ جۋرناليست نارتاي ارالبايۇلىنا بەرگەن سۇحباتىندا نەلىكتەن ءبىرقاتار ۋنيۆەرسيتەتتەردىڭ ليسەنزياسىن قايتارىپ الىپ جاتقانىن ءتۇسىندىردى. 

– پرەزيدەنت وسى باستامانى ايتتى، تاپسىرما بەردى. بۇل پرەزيدەنتتىڭ شەشىمى، ەندى ءبىز بۇل تاپسىرمانى ءتيىستى دەڭگەيدە ورىنداۋىمىز كەرەك. ارينە، بۇل وڭاي شارۋا ەمەس. قوعامدا بارلىعى تۇسىنەتىن سياقتى. ءبىراق ناقتى ءبىر ۋنيۆەرسيتەتكە كەلگەندە كەشە عانا ءتۇسىنىپ جۇرگەن ادامدار "مۇمكىن وسى ۋنيۆەرسيتەتتى جاپپاي-اق قويامىز" دەيدى. ەرتەڭ بالاڭ اۋىرىپ، ونى اۋرۋحاناعا اپارساڭ دۇرىس ەمەس ءبىلىم العان مامان وتىرسا، كەسىرى كىمگە تيەدى ؟ ەگەر دە بالاڭدى مەكتەپكە، بالاباقشاعا بەرسەڭ، ساتىپ العان ديپلوممەن، وقىماعان ماماندار وتىرسا، ول وزىنە تيەدى عوي. سونى قالاي ويلامايدى دەپ تاڭقالامىن. مۇنىڭ ءبارى مەملەكەتىمىزدىڭ الەۋەتى، ەكونوميكاسى دامۋى ءۇشىن وتە ماڭىزدى شەشىم. سوندىقتان بۇل ۋنيۆەرسيەتتەرگە قانشا جەردەن قيىن، جاعىمسىز بولسا دا ءبىز ورىنداۋىمىز كەرەك. 

ءبىز ەڭ ءبىرىنشى شىمكەنتتەگى ۋنيۆەرسيتەتتى جاپتىق. وندا 35 مىڭ ستۋدەنت وقيدى. ءبىزدىڭ ۇلتتىق قازۇۋ، ەنۋ-دا مۇنداي سان جوق. بۇل ۋنيۆەرسيەتتەت جابىلعاندا قانشاما ملرد-تاردان ايىرىلعانىن بىلەسىزدەر. ءقازىر سوتتا 10-نان استام ۋنيۆەرسيتەتتى جابۋ بويىنشا وتىنىشتەر جاتىر. ماعان كوبىسى ايتادى: "ۋنيۆەرسيەتتەردى جابۋ ابىروي بەرەتىن جۇمىس ەمەس، مۇنى قايتەسىڭ" دەپ. ءبىز ءبىر دۇنيەنى ءتۇسىنۋىمىز كەرەك. ءبىلىم ساپاسى مەملەكەتىمىزدىڭ دامۋىنا تىكەلەي بايلانىستى. سوندىقتان قانداي قيىن، ابىروي بەرمەيتىن جۇمىس بولسا دا مۇنى ىستەۋ كەرەك. 

ءقازىر قوعامنىڭ كوزى اشىق. قاي ۋنيۆەرسيتەت ساپالى، ساپاسىز ءبىلىم بەرىپ جاتقانىن بىلەدى. ۋنيۆەرسيتەتتەردى جاپقاندا الدىن-الا 3-4 اي بۇرىن اقپارات شىقتى. سول كەزدە بىردە-بىر ستۋدەنت كەتپەيدى. ستۋدەنتتەر، اتا-انالار تاراپىنان قۇجاتتارىمدى قايتىپ الايىن دەگەن قوزعالىس جوق. بۇل ۋنيۆەرسيەتكە بارعاندا ستۋدەنتتەر ءبىلىم الامىن دەپ ەمەس، قاعاز الامىن دەپ بارادى. بۇل وتە قيىن ماسەلە. 2021 جىلدان باستاپ جاڭا نورما ەنەتىن بولادى. بيىلعى جىلدان باستاپ مەملەكەتتىك ديپلوم بولمايدى. ءار ۋنيۆەرسيتەت ءوزىنىڭ ديپلومىن بەرەدى. 

ازاماتتارىمىز ءتۇسىنۋى كەرەك. ديپلوم، قاعاز – ەشكىمگە كەرەك ەمەس، كەرەگى – ءبىلىم. ءبىلىم ءۇشىن باراتىن بولسا، باسقاشا بولادى. ءبىز كەيبىر ۋنيۆەرسيتەتتەردى شاڭسورعىش دەيمىز. ويتكەنى ساپالى ءبىلىم بەرەتىن ۋنيۆەرسيتەتتەر وقۋدان شىعارىپ تاستايدى. ال، شاڭسورعىش ۋنيۆەرسيتەتتەر ونىڭ ءبارىن تەرىپ الىپ، نارىقتان وقي الماي شىعىپ كەتكەن بالالاردىڭ ءبارىن جيناپ الىپ ءوزىنىڭ ديپلومىن بەرەدى. ولار بويىنشا ءبىز ءتيىستى شەشىم قابىلداپ، نازاردا ۇستاۋدامىز، – دەدى مينيستر اسحات ايماعامبەتوۆ.