الاياقتىق بابى بويىنشا ءتورت رەت ءىستى بولىپ تۇرمەگە قامالىپ، ءبىراق مەرزىمىنەن بۇرىن بوساپ شىعا بەرگەن، ونداعان ءىس بويىنشا بەرەشەگىن وتەمەگەن كەلىنشەك الماگۇل باشيروۆا تۋرالى time.kz سايتىندا ماقالا شىقتى. ماقالا اۆتورى ميحايل كوزاچكوۆتىڭ سوزىنشە، بۇرىنعى قىلمىسكەر بۇگىندە بەلگىلى ارتىستەر كەلەتىن Le Femme سۇلۋلىق سالونىنا يەلىك ەتۋشىلەردىڭ ءبىرى. الماگۇل باشيروۆا سالوننىڭ ەكىنشى يەسى ءانشى ديلناز احمادييەۆا ەكەنىن ايتۋدا.

باسىلىم باشيروۆانىڭ العاش 2007 جىلى الاياقتىق جاساعانى ءۇشىن سوتتى بولعانىن جازدى. ول كەزدە ايىپتالۋشى سەمەي قالالىق سوتىندا مامان رەتىندە جۇمىس ىستەپ جۇرگەن. سوت ايىپكەردىڭ جاس ءارى جالعىزباستى انا ەكەنىن ەسكەرىپ، 5 جىلعا كولونياعا قاماۋ شەشىمىن شىعارادى. الايدا بالاسىن وسىرۋگە مۇمكىندىك بەرۋ ءۇشىن جازانىڭ كۇشىنە ەنۋى 10 جىلعا شەگەرىلگەن.

باشيروۆا بۇل وقيعادان سوڭ الماتىعا كەلىپ، ءۇش ايەلدى 16 ميلليون تەڭگەگە الداپ كەتكەن. بانكتەن 1،2 ميلليون تەڭگەنىڭ جوعالۋىنا دا باشيروۆانىڭ كىناسى بار دەلىنەدى.

بۇل جايت قۇقىق قورعاۋ ورگانى نازارىنان تىس قالماي، الاياق 9 جىلعا سوتتالادى. 

باشيروۆا تۇرمەدە ءجۇرىپ "اباقتىدان شىعارۋعا كومەكتەسەتىن تانىس ادۆوكاتىم بار" دەپ ايەلدەر كولونياسىنداعى كورشىسىنەن 7،5 مىڭ دوللار اقشا العان. اقشانى اتا-اناسىنا بەرگىزگەن. ۇزاماي الاياقتىڭ ارەكەتىن بىلگەن كولونياداعى كورشىسى ءتيىستى ورگانعا ارىزدانعان.

قىلمىسكەردىڭ تۇرمەدەن قالاي شىققانى بەلگىسىز، تەك 2010 جىلى بوستاندىقتا ءجۇرىپ، تاعى الاياقتىققا انىقتالعان. بۇل جولى ول 8 جىلعا سوتتالىپ، ونىڭ 4 جىلىن وتىرىپ شىعادى.

35 جاسىندا تۇرمەدەن شىققان باشيروۆا زاڭگەرلىك فيرما مەن "كونسالتينگ ازيا-يۋركوللەگيا" كومپانياسىن اشادى. الەۋمەتتىك جەلىگە جارناما بەرىپ، زاڭگەرلىك كومەككە مۇقتاج ادامداردان قىزمەتى ءۇشىن اقشا الا باستايدى. الدىمەن 300 مىڭ، كەيىن 1 جارىم ميلليون ارتىنشا 2 ميلليون تەڭگەنىڭ قىزمەتتەرىنە تاپسىرىس قابىلداپ، بىردە-بىر ءىستى سوڭىنا دەيىن جەتكىزبەگەن.

سونداي-اق ول ادۆوكاتتىق قىزمەتتەن بولەك، "قىزمەتكە تۇرعىزىپ بەرەم"، "جەر تەلىمىن الىپ بەرەم" دەگەن ۋادەمەن ادامداردان اقشا الىپ وتىرعان.

2017 جىلى كوپتەگەن ارىز بويىنشا ۇستالعانىندا ونىڭ ەشقانداي زاڭگەر ەمەس ەكەنىن، 3 رەت مەرزىمىنەن بۇرىن شارتتى تۇردە بوساپ شىققانى بەلگىلى بولعان. 2018 جىلى الماتى قالاسى بوستاندىق اۋداندىق سوتى ونى 7 جىلعا سوتتاعان. ارتىنشا قالالىق سوت جازانى 5 جىلعا تومەندەتكەن.

بۇگىندە باشيروۆانىڭ بوستاندىقتا جۇرگەنىن ايتقان جۋرناليست ونىڭ قايتا-قايتا بوساپ شىعا بەرەتىنىنە تاڭدانىس ءبىلدىرىپ، بۇگىندە ايىپكەر 10 وندىرىستىك ءىس بويىنشا بەرەشەكتى وتەمەگەنىن جەتكىزگەن. ونىڭ ىشىندە 2 قارىز سوڭعى قىلمىستىق ءىس بويىنشا قوزعالعان.

ماقالادا 40 جاستاعى كەلىنشەكتىڭ قارىزدى قايتارماي جۇرگەنىنە سوتتىڭ كوز جۇمىپ قاراپ وتىرعانى، 2019 جىلدىڭ 25 قازانىنان بەرى باشيروۆا شىمكەنت قالاسى ءال-فارابي اۋداندىق سوتىنىڭ شەشىمىمەن 5 جىلدىڭ تەك 1 جارىم جىلدان استامىن عانا تۇرمەدە وتكىزىپ، بوساپ شىققانى جازىلدى.

"الماگۇل باشيروۆانىڭ جاعدايى بۇگىندە جاقسى سياقتى. ينستاگرامدا ول ءوزىن Le Femme سۇلۋلىق سالونى يەلەرىنىڭ ءبىرى دەپ تانىستىرىپ ءجۇر. ونىڭ ايتۋىنشا، سالون يەلەرىنىڭ ءبىرى ءارتىس ديلناز احمادييەۆا كورىنەدى. الماگۇل بيكەش ءتۇزۋ جولعا ءتۇسىپ، الاياقتىقتىق قۇربانى بولعاندارعا وتەماقىنى قايتاراتىنىنا سەنىممەن قارايمىن. باستىسى شاشىن ارلەۋگە كەلگەن كليەنتتەر اكىمشىلىككە جۇمىسقا تۇرعىزۋ سەكىلدى باسقا قىزمەتكە كەلىسىپ قويماسا بولدى. ال ديلناز احمادييەۆاعا ساتتىلىك تىلەيمىن" دەيدى جۋرناليست ميحايل كوزاچكوۆ.