شەشەنستان پرەزيدەنتى رامزان كادىروۆ پەن رەسەي ليبەرالدى-دەموكراتيالىق پارتياسىنىڭ جەتەكشىسى ۆلاديمير جيرينوۆسكيي اراسىندا داۋ تۋدى. بۇل تۋرالى رەسەيلىك ب ا ق جازىپ جاتىر.

جۇما كۇنى (30 قازان) تۇندە كۋكموردا (تاتارستان قالاسى) 16 جاستاعى ءجاسوسپىرىم اۋداندىق پوليسيا ءبولىمىنىڭ عيماراتىن ءورت سوندىرگىش قوسپامەن ورتەمەك بولعان. ونى توقتاتپاق بولعان پوليسيا قىزمەتكەرلەرىنىڭ ءبىرىن جەتكىنشەك پىشاقپەن ءۇش رەت جاراقاتتادى. ەكىنشى پوليسەي جاسوسپىرىمگە وق اتىپ، ول جەدەل جاردەم كەلگەنشە كوز جۇمعان. وسى وقيعاعا قاتىستى پىكىر بىلدىرگەن جيرينوۆسكيي بارلىق ءدىني ءبىلىم بەرۋ ۇيىمدارىن جاقسىلاپ تەكسەرۋ كەرەكتىگىن ايتتى.

– ەۋروپا اراب جانە افريكا ەلدەرىنەن قونىس اۋدارۋشىلاردى جانە وزدەرىمەن بىرگە ەكسترەميستىك كوزقاراستاردى الىپ كەلگەندەردى جالدادى. مۇندا ەۋروپالىقتار باعاسىن تولەپ جاتىر. ءار ءتۇرلى ۋاعىزشىلار وسىعان ۇقساس يدەيالار اكەلەدى. ورتالىق ازيادا شەتەلدىك ۋاعىزشىلار ءدارىس بەرەتىن150 مەكتەپ اشىلدى. ول باعدارلامالاردا حريستياندارعا قارسى، ورىسقا قارسى جاعدايلاردى ۇگىتتەۋى مۇمكىن، – دەدى جيرينوۆسكيي بۇنىڭ سالدارى ەكسترەميستەر مەن راديكالداردىڭ پايدا بولۋىنا اپارىپ سوعاتىنىن ايتىپ.

بۇعان شەشەنستان باسشىسى رامزان كادىروۆ telegramm پاراقشاسىندا جازبا جاريالاپ، جيرينوۆسكييدىڭ پىكىرى ءوزىن اشۋلاندىردىعانىن جازعان.

– ليبەرالدى-دەموكراتيالىق پارتيانىڭ جەتەكشىسى ءوز سوزىندە مەنى جانە مەنىڭ كاريكاتۋرا تۋرالى مالىمدەمەمدى مەڭزەگەنىن ءبىلىپ وتىرمىن. ءبىراق بۇعان دەيىن مەن ساياساتكەر رەتىندە ەمەس، مۇسىلمان رەتىندە ءسوز سويلەگەنىمدى ەسكەرتكەنمىن. يسلامدا پايعامباردىڭ بەينەسىن سالۋعا، اسىرەسە كەلەمەجدەۋگە بولمايدى. سوندىقتان جيرينوۆسكييدىڭ بۇل تاقىرىپتى قوزعاماعانى ابزال. ودان دا توك-شوۋلارعا قاتىسسىن، سايلاۋعا دەيىن ساتىلعان مانداتتاردان العان اقشاسىن جۇمساسىن، ءوزىن-وزى جارنامالاسىن، كوشەگە شىعىپ، بيىككە كوتەرىلسىن، زاڭ جوبالارىن ازىرلەسىن ... ءبىراق ءدىن تۋرالى ايتپا، جيرينوۆسكيي! ءدىن مەن مادەنيەت دەگەن ۇعىمدار سەنىمەن ۇيلەسپەيدى، – دەپ جازدى كادىروۆ.  

وقي وتىرىڭىز:

♦ فرانسيا يسلامعا قاتىستى كاريكاتۋرادان باس تارتپاسا، كادىروۆ وتستاۆكاعا كەتەدى