قازاقستان مۇسىلماندارى ءدىني باسقارماسى مۇحاممەد پايعامباردىڭ سۋرەتىن كەلەمەجدەپ سالعان "Charlie hebdo" فرانسۋزدىق جۋرنالىنا قاتىستى مالىمدەمە جاسادى.
ءدىني باسقارما توزىمسىزدىك پەن وشپەندىلىك قوعامنىڭ تۇتاستىعى مەن مادەنيەتارالىق قاتىناستىڭ بۇزىلۋىنا الىپ باراتىنى جايلى جازدى.
"جۋىردا فرانسيانىڭ "Charlie Hebdo" جۋرنالىنىڭ مۇحاممەد پايعامباردىڭ (وعان اللانىڭ سالاۋاتى مەن سالەمى بولسىن) كەلەمەج سۋرەتىن سالۋى جانە كەيبىر بيلىك وكىلدەرىنىڭ ايتقان قيسىنسىز پىكىرى الەمدەگى بارلىق مۇسىلمانداردىڭ اشۋ-ىزاسىنا سەبەپ بولدى. شىنايى مۇسىلمان ءوزىنىڭ پايعامبارىنا بولعان سۇيىسپەنشىلىگىن، ونىڭ ناعىز ۇمبەتى ەكەنىن سەنىمى مەن ىزگى ىستەرى، ادەپتىلىگى مەن كوركەم مىنەزى ارقىلى كورسەتەدى. سونىمەن قاتار، مۇسىلماندار ءوز ءدىنى مەن پايعامبارىن قورلاۋعا جول بەرمەيدى. سەبەبى، پايعامبارعا يمان كەلتىرۋمەن قاتار ونى قورعاۋ دا مۇسىلماننىڭ مىندەتى بولىپ تابىلادى" دەلىنگەن مالىمدەمەدە.
سونداي-اق قازاقستان مۇسىلماندارى ءدىني باسقارماسى فرانسۋزدىق جۋرنالدىڭ ارەكەتتەرىنە ءوزىنىڭ كەلىسپەۋشىلىگىن ءبىلدىردى جانە مۇسىلمانداردى ءتۇرلى ارانداتۋشىلىق ارەكەتتەرگە بەرىلمەي، ءتوزىمدى بولۋعا شاقىردى.
پىكىر قالدىرۋ