ميكروقارجى ۇيىمدارىن بانكتەرگە تەڭەستىرگەندە كرەديت الۋشىلاردىڭ جاعدايى جاقسارادى. بۇل تۋرالى ۇلتتىق ەكونوميكا ءمينيسترى رۋسلان دالەنوۆ ايتتى.
– قارىز الۋشىلاردىڭ جاعدايى جاقسارادى. بۇگىنگى تاڭدا بانكتىك ەمەس سەكتورعا كىرەتىن ۇيىمدار ازاماتتارعا كرەديت بەرۋدە. ءبىراق مولشەرلەمەلەرى جوعارى، ايىپپۇلدارى مەن كوميسسيالارى دا جوعارى. قارىز الۋشىلار كەيدە ساۋاتسىز بولۋى مۇمكىن. اتالعان ۇيىمدار وسىنى پايدالانىپ، ازاماتتارىمىزدىڭ قۇقىعىن بۇزادى. سالدارىنان قارجىلىق تاۋەكەلدەر تۋىنداپ جاتادى، – دەدى مينيستر.
ونىڭ ايتۋىنشا، ميكروقارجى ۇيىمدارىن قارجى ۇيىمدارىنا تەڭەستىرۋ ۇسىنىلىپ، رەتتەلەتىن بولادى.
– كرەديتتىڭ شەكتى مولشەرلەمەسى بويىنشا تالاپ قويىلادى دەگەن ءسوز. باسشىلارى مەن اكسيونەرلەرگە ۇيىمدى جابدىقتاۋ جونىندە تالاپتار قويىلادى. ۋاكىلەتتى ورگان، ياعني، قارجى نارىعىن رەتتەۋ اگەنتتىگى ليسەنزيالاناتىن قىزمەتتەردى تەكسەرەتىن بولادى. مۇنىڭ ءبارى كرەديت الاتىنداردىڭ قۇقىعىن كۇشەيتىپ، قارجىلاي تاۋەكەلدەردى ازايتادى، – دەپ اتاپ ءوتتى رۋسلان دالەنوۆ.
پىكىر قالدىرۋ