كوروناۆيرۋس ينفەكسياسىن الدىن الۋعا جانە ەمدەۋگە، سونداي-اق Covid-19-دىڭ تارالۋىن بولدىرماۋ ماقساتىندا ەپيدەمياعا قارسى ءىس-شارالارعا قاتىسقانى ءۇشىن مەديسينا قىزمەتكەرلەرىنە ۇستەمەاقى تولەۋگە الەۋمەتتىك مەديسينالىق ساقتاندىرۋ قورىنا 154،7 ملرد تەڭگە ءبولىندى، دەپ حابارلايدى Qamshy.kz اقپارات اگەنتتىگى «الەۋمەتتىك مەديسينالىق ساقتاندىرۋ قورى» كەاق-نىڭ باسپا ءسوز قىزمەتىنە سىلتەمە جاساپ.
2020 جىلدىڭ ناۋرىز-قىركۇيەك ايلارى ارالىعىندا قورعا 135،6 ملرد تەڭگە تولەندى. شىعىنداردىڭ باسىم بولىگىن، ياعني 81،3 ملرد تەڭگەنى ەپيدەمياعا قارسى ءىس-شارالارعا تارتىلعان مەديسينا قىزمەتكەرلەرىنىڭ جالاقىسىنا ۇستەمە قۇرادى.
«دەنساۋلىق ساقتاۋ مينيسترلىگى ورتالىق دەڭگەيدە جانە جەرگىلىكتى اتقارۋشى ورگاندار كوروناۆيرۋستىڭ ىقتيمال ەكىنشى تولقىنىنا دايىندىق جۇمىستارىن جالعاستىرۋدا. ءوز كەزەگىندە قور كوروناۆيرۋس پەن پنيەۆمونيامەن اۋىراتىن ناۋقاستارعا كورسەتىلەتىن مەديسينالىق كومەكتىڭ ۋاقىتىلى تولەمىن جۇرگىزەدى. بۇل رەتتە، وسى اۋرۋلارمەن اۋىراتىن پاسيەنتتەرگە مەديسينالىق كومەك ءمامس جۇيەسىندەگى ساقتاندىرىلۋ مارتەبەسىنە قاراماستان كورسەتىلەدى» دەپ حابارلادى ءامسق باسپا ءسوز قىزمەتى.
ناۋرىزدان قىركۇيەككە دەيىن پروۆيزورلىق جانە كارانتيندىك ستاسيونارلارعا ەمدەۋگە جاتقىزۋدى قارجىلاندىرۋعا 24،5 ملرد تەڭگەدەن استام قاراجات جۇمسالدى، ولاردا كارانتيندىك وقشاۋلاۋ جانە قاجەت بولعان جاعدايدا 240 مىڭنان استام ادام ەمدەلدى.
وسى كەزەڭدە ينفەكسيالىق ستاسيونارلاردا 72 مىڭ پاسيەنت ەمدەلدى. Covid-19 جانە كوروناۆيرۋستىق پنيەۆمونيامەن اۋىراتىن ناۋقاستاردى امبۋلاتوريالىق جانە ستاسيونارلىق جاعدايدا ەمدەۋگە بارلىعى 18،8 ملرد تەڭگە جۇمسالدى.
پتر دياگنوستيكاسىن جۇرگىزۋگە 19 ملرد تەڭگەدەن استام قاراجات ءبولىندى. ناۋرىزدان قىركۇيەككە دەيىن جۇرگىزىلگەن تەستىلەۋ ءۇشىن قور 10،7 ملرد تەڭگە تولەدى. پتر-تەستىلەۋدەن ەلىمىزدىڭ ستاسيونارلارىندا 222 024 قازاقستاندىق، امبۋلاتوريالىق جاعدايدا 708 124 ادام ءوتتى.
پىكىر قالدىرۋ