Tengrinews.kz سايتى سيريادان قازاقستانعا قايتارىلعان ايەلدىڭ ءومىرىن باياندادى. وزگەلەرگە ساباق بولادى دەگەن ۇمىتپەن ماقالانىڭ قازاق تىلىندەگى نۇسقاسىن نازارلارىڭىزعا ۇسىنامىز. 

جاننا بولاشاق جارىمەن جوو-دا تانىستى. مۇرات بىردەن جانناعا باسىنا ورامال سالۋعا ۇگىتتەيدى. جاننا ۋاقىت وتە كەلە كيىنۋ ءستيلىن وزگەرتەدى. جاننانىڭ اتا-اناسى بۇنى قۇپ كورمەيدى. ونىڭ ۇستىنە قىزدارىنىڭ مۇراتتىڭ ايتقاندارىن بۇلجىتپاي ورىندايتىنىن جاقتىرتپايدى. اكەسى جاننانى مۇراتپەن قارىم-قاتىناستى توقتاتۋعا ۇگىتتەگەنىمەن ناتيجە شىقپايدى. جاننا كوپ ۇزاماي مۇراتقا تۇرمىسقا شىقتى. 

وتباسىلىق ءومىردىڭ ءبىرىنشى كۇنى-اق مۇرات ايەلىنەن مەملەكەتتىك جۇمىستان شىعىپ، قارا كيىم كيۋىن تالاپ ەتەدى. شاريعات بويىنشا ءومىر سۇرمەيتىن اتا-اناسىمەن ارالاسۋعا تىيىم سالدى. ءوزى كۇنى بويى "باۋىرلارىمەن" پاتەردە شەيحتەردىڭ لەكسياسىن تىڭداپ، ۇيگە اشۋلانىپ كەلەتىن بولعان. جاننا ءۇشىن بەس جىلعا سوزىلعان وتباسىلىق ءومىر پسيحولوگيالىق جانە قارجىلىق قيىندىققا تولى بولدى.

قارجىنىڭ تاپشىلىعى، باسپانانىڭ جوقتىعى، وركەنيەتتى ەلدىڭ ءومىر سالتىنان مەزى بولعان مۇرات سيرياعا كەتۋدى ۇيعارادى. جاننانىڭ اتا-اناسى قىزىن ەلدە قالدىرا المادى. ايەل ادام كۇيەۋىنىڭ ارتىنان ەرىپ ءجۇرۋى كەرەك دەگەن ءپرينسيپتى ۇستانعان جاننا اتا-اناسىنىڭ كوز جاسىنا قاراماستان ەكى بالاسىن الىپ مۇراتتىڭ ارتىنان ەرىپ كەتەدى. ولار ءبىرىنشى تۇركيا مەن سيريانىڭ شەكاراسىنا جەتەدى. ءبىر ايدان كەيىن سيريانىڭ ناعىز سوعىس مايدانىنا اينالعان يدليب قالاسىنا جول تارتادى.

جاننا كىشكەنتاي ەكى بالاسىمەن سۋ، جارىق، جىلۋ، تاماق، دارى-دارىمەك جوق، سناريادپەن توبەسى تەسىلگەن ۇيدە تۇرۋعا ءماجبۇر بولعان.

مۇرات دايش-قا قارجى تابۋ ماقساتىندا قىرعىزستانعا بارىپ، بانكتى توناۋعا تىرىسقان. ءوزىن مۇسىلمان دەپ اتاعان ادامداردىڭ ءبىر-بىرىن ءولتىرىپ، ايەلدەر ءبىر ەركەكتىڭ قولىنان ەكىنشىسىنە ءوتىپ سودىرلاردىڭ قولجاۋلىعىنا اينالعان. ال وتباسىلار ءوز ەركىمەن ەلدەرىنە قايتا الماي قينالعان. مۇنىڭ ءبارىن كورگەننەن كەيىن جاننا ءۇشىن كۇيەۋى ايتقان تازا، كىرشىكسىز الەم كوز الدىندا قۇبىجىققا اينالدى.

جاننا جولسەرىككە جالىنىپ كومەك سۇراپ ەكى بالاسىمەن زاڭسىز شەكارادان وتەدى. ول كەزدە جاننا ءۇشىنشى بالاسىنا اياعى اۋىر بولاتىن. ۇلتتىق قاۋىپسىزدىك كوميتەتىنىڭ كومەگىمەن جاننا بالالارىمەن قازاقستانعا قايتارىلدى.

قازاقستاندا تىيىم سالىنعان ۇيىمدا بولعانى ءۇشىن جاننا 5 جىلعا سوتتالدى. ۇلتتىق قاۋىپسىزدىك كوميتەتى وكىلدەرىنىڭ ايتۋىنشا، جاننانىڭ پسيحولوگيالىق جاعدايىن جاقسارتۋ وڭايعا سوقپادى. سيريادا ونىڭ ساناسىنا ابدەن ءسىڭىپ قالعان تۇسىنىكتەردەن ارىلتۋ ءۇشىن كوپ جۇمىس اتقارىلدى.

پسيحولوگتار، ءدىنتانۋشىلار، جاننانىڭ وتباسى ونىڭ ۋلانعان ءدىني كوزقاراسىن وزگەرتۋ ءۇشىن بارىن سالدى. ۇلتتىق قاۋىپسىزدىك كوميتەتى وكىلدەرى جاننانىڭ وزگەرگەنىن، ءقازىر الەمگە باسقا كوزبەن قارايتىنىن ايتادى. ءۇش جىلدان كەيىن جاننانى مەرزىمىنەن بۇرىن بوساتۋ تۋرالى ءوتىنىشى قاناعاتتاندىرىلدى.

مامانداردىڭ ارقاسىندا جاننا وزىنە سەنىمسىز، ۇياڭ ايەلدەن بولاشاققا ناقتى جوسپارى بار، دەسترۋكتيۆتى ويدان ادا ادامعا اينالدى.

جاننا ءقازىر بالالارىن ماحابباتقا بولەپ جۇرگەن قامقور انا. ءۇش جىل بويى باۋىر ەتى بالالارىن قاراعان اتا-اناسىنا ريزاشىلىعى زور.

جاننا وتكەن ومىرىندەگى كەلەڭسىزدەكتەردى سىناق رەتىندە قابىلداپ، ودان قورىتىندى شىعارا ءبىلدى.