مەملەكەت باسشىسى قاسىم-جومارت توقايەۆ جوعارعى سوت ءتوراعاسى جاقىپ اسانوۆتى قابىلدادى. بۇل تۋرالى اقوردا سايتى حابارلادى.
قازاقستان پرەزيدەنتىنە سوت جۇيەسىنە اكىمشىلىك ادىلەت مەحانيزمىن ەنگىزۋ بارىسى جايىندا مالىمەت بەرىلدى. سونداي-اق قاسىم-جومارت توقايەۆقا جاڭا سۋديالاردى ىرىكتەۋ جۇيەسىن جاقسارتۋعا، سوت پراكتيكاسىنىڭ بىرىزدىلىگىن قامتاماسىز ەتۋگە جانە سوت ءىسىن جۇرگىزۋ ساپاسىن ارتتىرۋعا باعىتتالعان ۇسىنىستار جونىندە ايتىلدى.
جاقىپ اسانوۆ بيىلعى جىلدىڭ 30 قازان كۇنى ونلاين فورماتتا وتكەن شانحاي ىنتىماقتاستىق ۇيىمىنا مۇشە مەملەكەتتەردىڭ جوعارعى سوت ءتوراعالارىنىڭ 15ء-شى كەڭەسىنىڭ قورىتىندىلارى تۋرالى مالىمەت بەردى.
پرەزيدەنت قىلمىستىق پروسەستە ايىپتاۋشى مەن قورعاۋشى تاراپتار اراسىندا ناقتى ءجارىسسوزدى قامتاماسىز ەتۋ ماسەلەسىنە نازار اۋداردى.
قاسىم-جومارت توقايەۆ ازاماتتاردىڭ، كاسىپكەرلەر مەن ينۆەستورلاردىڭ سوتقا دەگەن سەنىمىن ارتتىرۋ سوت تورەلىگى جۇيەسىنىڭ باستى باسىمدىعى ەكەنىن ەرەكشە اتاپ ءوتتى.
پىكىر قالدىرۋ