الماتى وبلىسىنىڭ اكىمى اماندىق باتالوۆ پرەزيدەنت جانىنداعى ورتالىق كوممۋنيكاسيالار قىزمەتىنىڭ الاڭىندا وتكەن بريفينگتە ۇيعىر اۋدانىنىڭ اتىن وزگەرتۋ ماسەلەسىنە پىكىر ءبىلدىردى.
– جۇمىس ىستەلىپ جاتىر. ءبىراق بۇل ماسەلە كۇن تارتىبىندە تۇرعان جوق. نەگە؟ سەبەبى ءقازىر ناۋقان (ءماجىلىس سايلاۋى - رەد.) باستالعالى جاتىر. ءبىز سايلاۋشىلاردىڭ، سايلاۋ ۋچاسكەلەرىنىڭ ءتىزىمىن ناقتىلادىق. كوشەلەردىڭ اتاۋىن وزگەرتۋ باستاماسى كوتەرىلدى. ءقازىر سايلاۋشىلاردىڭ تۇراتىن جەرلەرىنىڭ اتاۋىن وزگەرتۋگە بولمايدى. سايلاۋ وتكەننەن كەيىن بۇل ماسەلەگە ورالامىز. سول كەزدە شەشىمدى سىزدەرگە جەتكىزەمىز، – دەدى الماتى وبلىسىنىڭ اكىمى.
بيىل ماۋسىم ايىندا الماتى وبلىسى ۇيعىر اۋدانىندا جەرگىلىكتى قازاق جانە ۇيعىر جاستارى توبەلەسىپ، سالدارىنان 5 ادام پىشاق جاراقاتىن العان.
وبلىس باسشىلىعى داۋدى جولعا تالاسقاننان شىققان تۇرمىستىق سيپاتتاعى جانجال" دەگەنىمەن، تۇرعىندار توبەلەس استارىندا ءتۇيىنى تارقاتىلماعان تالاي تۇيىتكىل بار ەكەنىن ايتقان.
جانجالدان سوڭ اۋداننىڭ قازاق تۇرعىندارى ۇيعىر اۋدانىنىڭ اتاۋىن وزگەرتۋ ماسەلەسىن كوتەرگەن. اۋدانعا كەلگەن وبلىس باسشىسى اماندىق باتالوۆ تۇرعىندارمەن كەزدەسىپ، ولاردىڭ اۋدان اتاۋىن وزگەرتۋ تالابىن جوعارىعا جەتكىزەتىنىن مالىمدەگەن.
پىكىر قالدىرۋ