پولشادا اتىپ ولتىرىلگەن 16 جاستاعى قازاقستاندىقتىڭ ىسىنە بايلانىستى جاڭا دەرەكتەر شىقتى، دەپ جازادى SilkRoad پورتالى.

قازاقستاندىقتى ءولتىردى دەگەن كۇدىكپەن 51 جاستاعى چ.داريۋش ەسىمدى ازامات ۇستالعان. سوتقا دەيىنگى تەرگەۋ جۇرگەنگە دەيىن ول 3 اي قاماۋدا بولماق. كۇدىكتى كىناسىن مويىنداپ، جىگىتتى قابان ەكەن دەپ ويلاپ اتقانىن جەتكىزدى.

تەرگەۋ بارىسىندا كۇدىكتى ازامات كاسىبي اڭشى ەكەنى، قارۋ ۇستاۋعا رۇحساتى بارى انىقتالدى. ءىس بويىنشا تاعى ءبىر ازامات 41 جاستاعى ب.مارسين ەسىمدى ادام ۇستالعان. وعان ءۇش ايىپ تاعىلىپ وتىر. ول 5 جىلعا باس بوستاندىعىنان ايىرىلۋى مۇمكىن.

بۇعان دەيىن قاراشانىڭ 1-ىنەن 2-سىنە قاراعان ءتۇنى پولشاداعى مەكتەپ-ينتەرناتتىڭ بىرنەشە وقۋشىسى الما باعىنا سەرۋەندەۋگە بارعاندا وق اتىلىپ، ءبىر ادامنىڭ قازا تاپقانى حابارلانعان. قايتىس بولعان 16 جاستاعى يسمايل ەسىمدى شىعىس قازاقستان وبلىسىنىڭ تۋماسى ستانيسلاۆ كونار اتىنداعى كوللەدجدە وقىپ جۇرگەنى بەلگىلى بولدى.